Ижтимоий тармоқларда 9-синф ўқувчисини бир нечта болалар калтаклагани ҳақида видео ва фотолар тарқалди. Ҳолат юзасидан Болалар омбудсмани изоҳ берди.
Маълум қилинишича, 19 ноябрь куни Тошкент вилояти Ўрта Чирчиқ туманидаги 50-мактабнинг 9-синф ўқувчиси А.С. (ўғил бола) жисмоний тарбия дарси машғулотида синфдоши А.Э. билан зиддият келиб чиққан. Оқибатда бола А.Э. ва бошқа ўқувчилар томонидан калтакланган.
Натижада бола танасининг турли жойларига жароҳат етган, бурун қисми шикастланган.
Ҳозирда ҳолат юзасидан терговга қадар текширув ҳаракатлари олиб борилмоқда.
А.С.га нисбатан судга оид тиббий экспертиза тайинланди.
Ўқувчилар ўртасида муштлашувлар
2022 йилнинг октябрида ижтимоий тармоқларда Наманганнинг Косонсой туманида мактаб ўқувчилари муштлашуви акс этган тасвирлар тарқалганди. Ноябрда эса Тошкентда ўқувчилар футболдаги жанжал сабаб муштлашиб кетган эди. Кейинроқ пойтахт ИИББ воқеага муносабат билдириб, мазкур ҳолат юзасидан Янгиҳаёт тумани ИИО ФМБ томонидан текширув ўтказилаётганини маълум қилган.
Шунингдек, Тошкентда мактаб ўқувчилари “Америка киносига тақлид қилиб” муштлашув уюштиргани, Хоразм вилояти Урганч туманида жойлашган икки мактаб ўқувчиси ўртасида жанжал содир бўлгани тўғрисида хабар берилганди.
2023 йилнинг июнь ойида Тошкент шаҳар Юнусобод туманида жойлашган мактабларнинг бирида ўқувчи йигит бир неча тенгдошлари томонидан калтакланганди.
Изоҳ (0)