“Ҳеч қайси машина, ҳатто автобуслар ҳам қизил чироққа тўхтамайди” — Зангиота маҳаллий аҳолиси

Тошкент вилоятининг Зангиота тумани “Найман” маҳалласидаги 7-мактаб олдидаги светофорда “Нива” ҳамда “Жигули” тўқнашган видео тарқалганди. Мазкур видеони “Дарё”га улашган мурожаатчиларга кўра, аҳоли мактаб олдидаги пиёдалар ўтиш жойидан юрак ҳовучлаб ўтади. Фарзандларининг мактабга ўтиб-қайтишидан қўрқади. Боиси, ушбу ҳудуддан ҳаракатланувчи автомобиллар светофорнинг қизил чироғига умуман амал қилмайди. 

“Нива”да яшил чироқда чиқишимга қарамасдан, қарама-қарши йўналишдан чиқиб келган “Жигули” менга келиб урилди. Агар шу ерда болалар бўлганда нима бўларди? Ёнимиздаги мактабда 200 нафар ўқувчи ўқийди. Шуни ўйлаб, светофорга камера ҳам қўйиб беришни сўраб мурожаат қиламиз, аммо натижа йўқ. Камера қўйилса ҳайдовчилар светофор ишораларига амал қилишса, мана бундай воқеалар содир бўлмасди, дейди ҳайдовчи.

ЙТҲ ҳақида маълумот берган вилоят ИИББ Йўл ҳаракати хавфсизлиги бошқармаси воқеа 15 октябрь куни соат 12:00 да содир бўлганини билдирди. 

Тошкент вилояти Зангиота тумани “Найман” маҳалласи ҳудудидан ўтган В 004 Тошкент шаҳри — Келес — Қозоқкентсой — М39 автомобиль йўлининг 16-километрида 35 ёшли ҳайдовчи М.З “Ваз 2101” русумли транспорт воситасида йўл ҳаракати қоидаларини бузиб, қарама-қарши йўналишга чиққан ҳолда, светофор чироқларига амал қилмай ҳаракатланиб келган. Шу пайт ушбу йўлга қўшилиш мақсадида ички кўчадан чиқиб келган 37 ёшли Қ.Қ. бошқарувидаги “Нива” билан тўқнашув содир этган. ЙТҲ натижасида “Жигули”нинг 15 ёшли йўловчиси А.З енгил тан жароҳати олиб туман шифохонасига мурожаат қилган, дейилади масъуллар изоҳида. 

Қўшимча қилинишича, мазкур ҳолат юзасидан Зангиота тумани ИИБ ЙҲХБ томонидан суриштирув ишлари олиб борилмоқда.

Мурожаатчиларнинг “Дарё”га гапириб беришича, улар ушбу муаммо ечими учун кўплаб ташкилотларга мурожаат қилган. 

Балки ишонмассиз, ҳатто автобус ҳам ушбу светофорга амал қилмай, қизил чироқда ҳаракатланади. Фарзандларимиз учун ҳам ўзимиз учун ҳам бу йўл жудаям хавфли, тартибга олишларини илтимос қилардик, дейди улар. 

Аҳоли гапининг исботи сифатида қизил чироққа амал қилмаган автобус видеосини ҳам юборди. 

Масъуллар фақат ЙТҲ ҳақида маълумот бериш билан чекланмай ҳудудда камера ўрнатилишида ҳам кўмак беришса яхши бўларди. Бу ерга камера керак. Камера бўлсагина ҳайдовчилар қизил чироқ ишорасига амал қилишлари мумкин, дейди мурожаатчилар.