Rossiya 28-may kuni 2-iyunda Istanbulda Ukraina bilan to‘g‘ridan-to‘g‘ri muzokaralarning ikkinchi bosqichini o‘tkazishni taklif qildi. Kiyev bunga javoban tomonlar pozitsiyalarini aniqlashtirish shartini qo‘ydi.
Rossiya Tashqi ishlar vaziri Sergey Lavrov o‘zining videobayonotida Ukrainaga 2-iyunda Istanbulda muzokaralarning ikkinchi bosqichini o‘tkazishni taklif etdi. Tashqi ishlar vazirligi saytida e’lon qilingan bayonotga ko‘ra, kelgusi uchrashuvda Rossiya tomoni Kiyevga “inqirozning asosiy sabablarini ishonchli bartaraf etishning barcha jihatlari bo‘yicha bizning nuqtai nazarimizni bayon etuvchi” tinch yo‘l bilan hal qilish shartlari to‘g‘risidagi memorandumni taqdim etmoqchi.
“Rossiya tomoni, kelishilganidek, tezkorlik bilan tegishli memorandumni tayyorladi. Unda inqirozning asosiy sabablarini ishonchli hal etishning barcha jihatlari bo‘yicha nuqtai nazarimiz bayon etilgan.
Vladimir Medinskiy boshchiligidagi delegatsiyamiz ushbu memorandumni Ukraina delegatsiyasiga taqdim etishga va 2-iyun dushanba kuni Istanbulda qayta tiklangan to‘g‘ridan-to‘g‘ri muzokaralarning ikkinchi bosqichida zarur tushuntirishlar berishga tayyor”, dedi Rossiya tashqi ishlar vaziri Sergey Lavrov.
Chorshanba kuni kechqurun Istanbuldagi birinchi bosqichda delegatsiyaga rahbarlik qilgan Ukraina mudofaa vaziri Rustem Umerov Rossiya Federatsiyasiga Ukraina pozitsiyasini aks ettiruvchi hujjatni topshirganini va ularga javoban “memorandum” kutayotganini tasdiqladi.
“Rossiya delegatsiyasi rahbariga Ukraina nuqtayi nazarini aks ettiruvchi hujjatimizni topshirdim. Ular mazkur hujjatlarni qabul qilishdi.
Ukrainaning to‘liq va so‘zsiz ravishda o‘t ochishni to‘xtatishga hamda keyingi diplomatik ishlarni davom ettirishga tayyorligini tasdiqlayapmiz. Biz rossiyaliklar bilan uchrashuvlarga qarshi emasmiz va ularning “memorandum”ini kutmoqdamiz, toki uchrashuv behuda bo‘lmasin va urushning tugashini haqiqatan ham yaqinlashtirsin.
Rossiya tomonining hujjatni bizga rasmiylashtirish uchun topshirishiga kamida to‘rt kun vaqti bor.
Ukraina har doim maksimal darajada konstruktiv bo‘lgan va shunday bo‘lib qoladi. Tomonlarning uchrashuvi natija berishi lozim. Shu bois, har bir uchrashuvga puxta tayyorgarlik ko‘rish zarur”, deydi Ukraina mudofaa vaziri Rustem Umerov.
Istanbulda 16-may kuni so‘nggi uch yil ichida ilk bor Rossiya va Ukraina o‘rtasida to‘g‘ridan-to‘g‘ri muzokaralar bo‘lib o‘tdi. Rossiya delegatsiyasiga Rossiya prezidenti yordamchisi Vladimir Medinskiy, Ukraina delegatsiyasiga esa mudofaa vaziri Rustem Umerov boshchilik qildi. Uchrashuv taxminan ikki soat davom etdi va bir qator kelishuvlar “mingga ming” formulasi bo‘yicha harbiy asirlarni almashish, o‘t ochishni to‘xtatish rejalarini tayyorlash va keyingi uchrashuv bo‘yicha prinsipial kelishuv bilan yakunlandi.
23-25-may kunlari Rossiya va Ukraina o‘rtasida asirlar almashinuvi amalga oshirildi. Birinchi kuni tomonlarning har biri 270 nafar harbiy va 120 nafar fuqaroni, ikkinchi kuni 307 nafar harbiy xizmatchini, uchinchi kuni esa 303 nafar harbiy xizmatchini topshirdi. Ushbu almashinuv 2022-yilda jangovar harakatlar boshlanganidan beri eng yirik almashinuv bo‘ldi.
Izoh (0)