Rossiya va Ukraina o‘rtasidagi tinchlik muzokaralari turg‘unlik holatida qolmoqda. Bu haqda Rossiya Tashqi ishlar vazirligining axborot va matbuot departamenti direktori o‘rinbosari Aleksey Zaytsev ma’lum qildi.
Zaytsev muzokaralarning buzilishida Ukrainani aybladi. “Ukraina siyosatchilarining bayonotlari ularning muzokaralarni davom ettirishni istamasligidan yaqqol dalolat beradi”, — dedi u.
TIV vakili may boshida Ukraina prezidenti Vladimir Zelenskiy muzokaralar istiqbolini ko‘rmayotgani haqida aytgani, shuningdek, Ukraina milliy xavfsizlik va mudofaa kengashi kotibi Oleksiy Danilov “tinchlik shartnomasining har qanday imkoniyatini” rad etganini eslatdi.
So‘nggi marta ikki tomonning yuzma-yuz muzokaralari mart oyi oxirida Istanbulda bo‘lib o‘tgandi. Yakunda tomonlar muzokara jarayonida ma’lum yutuqlarga erishilganini e’lon qilgan edi.
Istanbul muzokaralaridan ko‘p o‘tmay, Moskva Kiyevni nomuvofiqlikda va erishilgan kelishuvlardan uzoqlashishga urinishda ayblay boshladi. Ukraina rasmiylari, o‘z navbatida, Rossiya armiyasining jinoyatlari haqidagi ma’lumotlar fonida Ukraina jamiyati Rossiya Federatsiyasi bilan har qanday kelishuvga unchalik tayyor emasligini bildira boshladi.
Mavzuga doir:
- Germaniya Ukraina xavfsizligini kafolatlashga tayyor, AQSH hozircha yo‘q. Istanbuldagi muzokaralarga dunyo mamlakatlarining munosabati
- Hindiston bosh vaziri Putin va Zelenskiyga to‘g‘ridan to‘g‘ri muzokara o‘tkazishni taklif qildi
- Lukashenko: “Moskva va Kiyev muzokaralarini Belarusning ishtirokisiz o‘tkazish mumkin emas”
Izoh (0)