Rossiya delegatsiyasi Ukraina bilan muzokaralar o‘tkazish uchun Belarusga yetib keldi, deya ma’lum qildi prezident matbuot kotibi Dmitriy Peskov. Delegatsiya tarkibidan Tashqi ishlar vazirligi, Mudofaa vazirligi, prezident ma’muriyati “va boshqa idoralar vakillari joy olgan”.
“Biz ushbu muzokaralarni Gomel shahrida boshlashga tayyormiz”, — dedi Peskov.
Minsk Rossiya va Ukraina o‘rtasida Gomeldagi muzokaralar uchun zarur bo‘lgan hamma narsani tayyorlab qo‘ygan va protokol masalalari hal etilishini ta’minlamoqda, deyiladi Belarus Tashqi ishlar vazirligi bayonotida.
Ukraina prezidenti Vladimir Zelenskiy Kiyev Rossiya bilan tinchlik va muzokaralarni istashini aytdi. Ammo u muzokaralar uchun Varshava, Budapesht va Istanbul singari boshqa shaharni tanlashni taklif qilmoqda. Zelenskiyning aytishicha, harbiy hujumlar Belarus tomonidan ham amalga oshirilgani sababli u ushbu davlat hududida muzokaralar olib bormoqchi emas.
Agar hududingizdan hech qanday agressiv harakatlar bo‘lmaganida edi, Minskda gaplashishimiz mumkin bo‘lardi. Bizga hududidan raketalar uchmaydigan istalgan mamlakatdagi har qanday shahar ma’qul keladi. Shundagina muzokaralar halol bo‘lishi va urushga chindan barham berishi mumkin, — dedi Ukraina prezidenti.24-fevral kuni Ukrainaga Rossiya bosqini boshlanganidan bir necha soat o‘tib, Belarus prezidenti Aleksandr Lukashenko tomonlarni Minskda muzokara o‘tkazishga taklif qilgandi. 25-fevral kuni Ukraina prezidenti ofisining vakili va Zelenskiyning o‘zi muzokara o‘tkazish taklifi bilan chiqdi. Bayonot Ukrainaning “betaraflik maqomi”ni muhokama qilishga tayyorligi haqida edi.
O‘sha kuni Kreml Rossiya prezidenti Minskda muzokaralar o‘tkazishni taklif qilayotgani va u yerga delegatsiya yuborishga tayyorligini ma’lum qildi. Keyinroq Dmitriy Peskov Ukraina Minskda uchrashishdan bosh tortganini, keyin esa “umuman aloqani uzib qo‘yganini” aytdi. Ukraina prezidentining matbuot kotibi Sergey Nikiforov buni rad etdi. U Kiyev va Moskva “muzokara joyi va vaqti”ni muhokama qilayotganini bildirgan.
26-fevral kuni Ukraina tomoni avvalroq Rossiya bir qator “qabul qilib bo‘lmaydigan” ultimatum talablarini ilgari surgani haqida xabar berdi. Shundan so‘ng, yig‘ilish qayerda va qanday tarkibda o‘tishi to‘g‘risidagi muhokama to‘xtatildi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Mavzuga doir:
- Zelenskiy Aliyev va Erdo‘g‘on Putin bilan muzokaralar bo‘yicha takliflar bilan chiqishganini ma’lum qildi
- Putin Ukraina harbiylaridan mamlakatda hukumatni o‘z qo‘llariga olishni so‘radi
- Ukraina Rossiya bilan betaraflik maqomi haqida gaplashishdan qo‘rqmaydi, ammo kelishuvlarning bajarilishiga kim kafolat beradi? — Ukraina prezidenti ofisi
Izoh (0)