Rossiya tashqi ishlar vaziri Sergey Lavrov mamlakat Ukrainadagi janglarni faqat tinch yo‘l bilan hal qilish bo‘yicha muzokaralar Moskva uchun maqbul bo‘lgan qat’iy va barqaror natija berganidagina to‘xtatishini ma’lum qildi.
Uning ta’kidlashicha, Rossiya aniq kelishuvlarsiz to‘qnashuv chizig‘ida “darhol yarashish” va o‘t ochishni to‘xtatish variantini qabul qilmaydi.
Men faqat bizning pozitsiyamizni tasdiqlashim mumkin, chunki u siz tilga olgan shaxsning pozitsiyasidan farqli o‘laroq o‘zgarmadi. Zelenskiy esa o‘z fikrini yashil maykalardan ham tez-tez o‘zgartiradi. Yevropa mamlakatlarining pozitsiyasini ham tushunish qiyin, chunki ularning qarashi ham ancha beqaror. Bu fonda AQSHning pozitsiyasi ajralib turadi. U izchil bayon etilgan bo‘lib, shunchaki darhol yarashib, kesishish chizig‘ini qoldirib, keyin nima qilishni o‘ylashga undamaydi. Biz har doim bunday variant bizni qoniqtirmasligini ta’kidlab kelganmiz, dedi Lavrov Turkiya tashqi ishlar vaziri Hoqon Fidan bilan muzokaralar yakunlari bo‘yicha o‘tkazilgan matbuot anjumanida.
Rossiya TIV tahbari Rossiyaning Ukraina bilan ham, Yevropa bilan ham tinchlikka erishishga xayrixohlik ruhida yordam berishni xohlagan har qanday vakillar bilan muzokaralar olib borishga tayyorligini ta’kidladi. Lavrov yana bir bor Rossiya nuqtayi nazariga ko‘ra, 2022-yil bahorida Kiyev va Moskva uchrashuvlarida ishlab chiqilgan Istanbul kelishuvlari Ukraina bo‘yicha muzokaralar uchun asos bo‘lishi mumkinligini eslatib o‘tdi.
Vladimir Putin avvalroq jangovar harakatlarni to‘xtatish shartlari sifatida Ukraina armiyasining DXR va LXR, Xerson hamda Zaporojye viloyatlaridan chiqib ketishini, shuningdek, Ukrainaning NATOga a’zo bo‘lishdan voz kechishini ko‘rsatgan edi. Rossiya Tashqi ishlar vazirligi jangovar harakatlarni tugatishga intilayotgan AQSH prezidenti Donald Trampning rejasi hozircha noaniq ekanligini ta’kidladi. Ukraina esa o‘z navbatida ittifoqchilaridan xavfsizlik kafolatlarini olishda qat’iy turibdi.
Avvalroq Ukraina prezidenti Vladimir Zelenskiy matbuot anjumanida urushni tugatish va Rossiya bilan sulh tuzish istiqbollari, AQSH bilan muzokaralar, Tramp bilan munosabatlar hamda Ukrainadagi saylovlar masalasi haqida gapirgandi.
Jurnalistlar bilan suhbatda Zelenskiy Ukrainada tinchlik o‘rnatish uchun zarur bo‘lsa, prezidentlik lavozimini tark etishga tayyorligini aytdi.
Agar Ukrainaga tinchlik uchun kerak bo‘lsa, agar sizga juda muhim bo‘lsa, lavozimimni tark etishimga tayyorman. Agar shunday shart darhol qo‘yilsa, men buni NATO a’zoligiga almashtira olaman, deya u jurnalistning savoliga javob berdi.
Izoh (0)