Xitoyning Qingxay provinsiyasida qurilishi ketayotgan ko‘prikning asosiy kabeli uzilib, qulab tushdi. Baxtsiz hodisa oqibatida 12 nafar ishchi halok bo‘ldi, 4 nafari esa bedarak yo‘qoldi. Bu haqda Xinhua xabar berdi.
Fojia 22-avgust kuni, mahalliy vaqt bilan soat 03:00 atrofida Qingxay provinsiyasining Jainka okrugida sodir bo‘lgan. Qurilishi ketayotgan ko‘prikda 108 metr uzunlikdagi po‘lat to‘sinning asosiy qovurg‘asi uzilib ketgan. Bu paytda qurilish maydonchasida jami 16 nafar ishchi bo‘lgan.
Qutqaruv ishlari zudlik bilan boshlangan: soat 14:00 ga kelib, hodisa joyiga 806 nafar qutqaruvchi, 91 ta texnika, 27 ta qayiq, 1 vertolyot va 5 ta robot jalb etilgan. Shuningdek, atrofdagi 6 ta shifoxonaga jabrlanganlar yetkazilgan. Ushbu voqeadan xabar topgandan so‘ng, Xitoy favqulodda vaziyatlar boshqarmasi maxsus ishchi guruhni voqea joyiga yuborib, qutqaruv operatsiyasini boshqargan. Mutasaddilar darhol suvga cho‘kkan ishchilarni aniqlash va ularni topish uchun barcha resurslarni safarbar qilishni buyurgan.
Shuningdek, halokat sabablari tez fursatda aniqlanishi va kelgusida shunday hodisalarning oldi olinishi lozimligi ta’kidlangan. Ko‘prik po‘lat ark tipida qurilayotgan bo‘lib, uning asosiy qismi avgust oyning oxirigacha bitkazilishi rejalashtirilgan edi.
Izoh (0)