Xitoyning Hindistondagi elchisi Xu Feyxong AQSH prezidenti Donald Tramp tomonidan Hindistonga nisbatan joriy etilgan 50 foizlik boj tariflarini tanqid qilib, Pekin Nyu Dehlini bu masalada qo‘llab-quvvatlashini bildirdi. Bu haqda The Independent xabar berdi.
Elchining fikricha, Vashington bojlarni “savdo kelishuvlarida bosim vositasi” sifatida qo‘llamoqda. Bunday harakatlar oldida jim qolish yoki murosa qilish bosqinchilikni yanada kuchaytiradi.
“AQSH hind tovarlariga nisbatan bojlarni 50 foizgacha oshirib, yanada bosim o‘tkazishini bildirmoqda. Xitoy bu kabi choralarni qat’iy qoralaydi va Jahon savdo tashkilotiga asoslangan ko‘p tomonlama savdo tizimini qo‘llab-quvvatlash uchun Hindiston tomonida qat’iy turadi”, dedi Xu Feyxong Nyu Dehlida o‘tkazilgan tadbirda.
Ushbu bayonot Xitoy tashqi ishlar vaziri Van Ining Hindistonga qilgan tashrifidan keyin yangramoqda. Tashrif chog‘ida ikki davlat chegara ziddiyatlarini hal qilish, aviaqatnovlarni tiklash hamda savdo aloqalarini kuchaytirish bo‘yicha kelishuvga erishgan.
Xu Feyxong Hindiston va Xitoyni Osiyo iqtisodiyotining “ikki dvigateli” deb atab, ularning hamkorligi mintaqa va butun dunyo uchun foydali ekanini ta’kidlagan. Shuningdek, Pekin AQSHdan chetga chiqayotgan hind mahsulotlarini o‘z bozorida qabul qilishga tayyor ekanini bildirgan. Hindiston bosh vaziri Narendra Modi esa X ijtimoiy tarmog‘ida shunday xabar qoldirgan:
“Xitoy va Hindiston o‘rtasidagi barqaror, bashorat qilsa bo‘ladigan va konstruktiv munosabatlar mintaqaviy hamda global tinchlik va farovonlikka katta hissa qo‘shadi”.
Izoh (0)