Belarus prezidenti Aleksandr Lukashenkoning da’vo qilishicha, 2022-yilda rus qo‘shinlari Kiyevga yaqinlashganda, ukrainalik generallar unga qo‘ng‘iroq qilib, go‘yo taslim bo‘lishni xohlashgan.
Lukashenko unga kim qo‘ng‘iroq qilganiga aniqlik kiritmagan.
“Ukrainalik generallar menga qo‘ng‘iroq qilib, urushni to‘xtatish va qandaydir tarzda taslim bo‘lish uchun men orqali Putin bilan bog‘lanishni so‘rashdi”, dedi Belarus prezidenti Yevrosiyo xavfsizligi bo‘yicha Minsk xalqaro konferensiyasidagi chiqishi chog‘ida.
Belarus rahbarining fikricha, Ukrainada hozirda harbiy mojaroga barham berishni istaydigan aqlli odamlar qolgan. Uning so‘zlariga ko‘ra, bular birinchi navbatda “bu qirg‘inni tugatishni xohlaydigan” harbiylardir. U 2022-yilning bahorida “butun G‘arb va Rim papasi” vaziyatga qo‘shilib, rus qo‘shinlarining oldinga siljishini to‘xtatishni so‘raganini eslagan.
“Qo‘shinlar Kiyevdan olib chiqildi. Keyin-chi? Yana bir bor ishondik. Oxir-oqibat nima bo‘ldi?”, deya qo‘shimcha qilgan u.
Sentyabr oyi boshida Vladimir Putin Rossiya 2022-yilda erishilgan Istanbul kelishuvlari asosida Ukraina bilan muzokaralar o‘tkazishga rozi bo‘lganini ma’lum qilgandi. Kelishuvlar to‘plami Ukrainaning NATOga a’zo bo‘lish va yadroviy qurol yaratishdan bosh tortishini o‘z ichiga olgan. Rossiya va Ukraina tomonlari o‘rtasidagi muzokaralar 2022-yilning may oyida Kiyev tashabbusi bilan to‘xtatilgan.
30-oktyabr kuni Rossiya prezidenti matbuot kotibi Dmitriy Peskov Ukraina armiyasi Rossiyaning barcha hududlaridan to‘liq olib chiqilmaguncha, Moskva muzokaralar olib bormasligini aytgan.
Izoh (0)