“Daryo” nashri 7-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Makron Putinning Xirosimaga tashlangan bomba haqidagi so‘zlaridan xavotirga tushdi
Rossiya prezidenti Vladimir Putin fransiyalik hamkasbi Emmanuel Makron bilan suhbatda Ikkinchi jahon urushi oxirida Xirosima va Nagasakiga atom bombalari tashlanganini eslatib o‘tgan, bu esa Makronni jiddiy tashvishga solgan, deb yozmoqda Daily Mail diplomatik manbalarga tayanib.
Manbalarning aytishicha, Putin suhbatda Yaponiyaning ushbu shaharlarida yadro qurolidan foydalanish Yaponiyaning taslim bo‘lishiga va Ikkinchi jahon urushi tugashiga olib kelgani haqida fikr bildirgan.
“G‘alaba qozonish uchun yirik shaharlarga hujum qilish shart emas”, — degan u.
“Makron qattiq xavotirga tushdi. Bu Putin Kiyevga tegmasdan Ukraina sharqida taktik yadro qurolini qo‘llashi mumkinligiga juda jiddiy ishora bo‘lib tuyuldi”, — dedi manbalardan biri.
Kreml xabarlariga ko‘ra, Putin va Makron oxirgi marta 11-sentabr kuni telefon orqali gaplashgan. O‘shanda Rossiya prezidenti, xususan, “Ukrainaning Zaporojye atom elektr stansiyasi obyektlariga, jumladan, halokatli oqibatlarga olib keluvchi radioaktiv chiqindilarni saqlash omboriga muntazam hujumlari”ga e’tibor qaratgan.
G‘arb mamlakatlari Moskva va Kiyev o‘rtasida yarashuvga erishish yo‘llarini o‘zaro muhokama qilmoqda
G‘arb mamlakatlari vakillari Rossiya va Ukraina o‘rtasidagi yarashuvning ehtimoliy shartlari haqida o‘zaro fikr almashmoqda, deb yozadi The Wall Street o‘z manbalariga tayanib. Ayni paytda ushbu davlatlar rasmiy yetakchilari va mansabdorlari “Ukrainani boshi berk ko‘chaga kiritib qo‘yishi mumkin bo‘lgan” bayonotlardan qochishga harakat qilmoqda.
Xalqaro aloqalar bo‘yicha Yevropa kengashi Varshava idorasi rahbari Petr Burasning so‘zlariga ko‘ra, hozir G‘arbda “yakuniy sulh qanday ko‘rinishga ega bo‘lishi haqida aniq tasavvur yo‘q”. “Berlin, Parij yoki Vashington Kiyevni Zelenskiy Ukraina manfaatlariga to‘g‘ri kelmaydi deb hisoblaydigan biror narsaga undaydi, deb o‘ylamayman”, — dedi tahlilchi.
WSJ yozishicha, G‘arb mansabdorlari mamlakatlar o‘rtasida tinch yo‘l bilan tartibga solish masalasida kelishmovchiliklar chiqishi mumkin, ayniqsa, Ukraina Rossiyaga qarshi chiqishda davom etib, Qrimni qaytarib olishga urinadigan bo‘lsa.
Hozir, deb yozadi nashr diplomatlarga tayanib, Vashington va uning ittifoqdoshlari Ukrainada muzokaralar yo‘li bilan jangovar harakatlarni to‘xtatish istiqbollarini ko‘rmayapti. AQSH va Yevropa mamlakatlari hukumatlari fikricha, Rossiyaning xatti-harakatlari bunga imkoniyat yaratmaydi, balki vaziyat keskinlashuviga olib boradi, deb yozadi gazeta.
Baydenning maslahatchisi Putinga yaqin odamlar bilan Ukraina va yadroviy qurollar haqida yashirin muzokaralar olib borgan — WSJ
So‘nggi oylarda AQSH milliy xavfsizlik bo‘yicha maslahatchisi Jeyk Sallivan Rossiya prezidentining yordamchisi Yuriy Ushakov va Rossiya Xavfsizlik kengashi kotibi Nikolay Patrushev bilan bir necha marta maxfiy muzokaralar o‘tkazgan. Bu haqda The Wall Street Journal nashri AQSH rasmiylari va ularning ittifoqchilari orasidagi manbalariga asoslanib xabar bermoqda.
Gazeta suhbatdoshlariga ko‘ra, bu muloqotlardan maqsad Ukrainadagi urushni bartaraf etish emas, balki keskinlashuvning oldini olish va mamlakatlar o‘rtasidagi aloqa kanallarini qo‘llab-quvvatlash bo‘lgan.
Bundan tashqari, nashrning yozishicha, Sallivan Ukraina rahbariyatini Rossiya bilan muzokaralarga tayyorligini oshkora e’lon qilishga chaqirgan. Avvalroq The Washington Post gazetasi ham AQSH prezidentining ma’muriyati Kiyevga shunday so‘rov yuborgani haqida xabar bergandi. Sallivanning matbuot kotibi jurnal ma’lumotlariga izoh bermadi.
Oq uyning oxirgi paytlardagi bayonotlarida AQSH prezidenti maslahatchisi Rossiya rasmiylari bilan muzokaralar olib borgani haqida gap yo‘q. Ayni vaziyatda Kreml ham so‘rovga javob bermagan.
AQSHning bir qator rasmiylari Sallivan AQSH ma’muriyati a’zolari ichida Rossiya bilan aloqalarni qo‘llab-quvvatlash bo‘yicha tanilganini aytsa, boshqa yuqori martabali siyosatchilar Moskva bilan hozirgi diplomatik va harbiy sharoitlarda muzokaralar samarali bo‘lmaydi, deb hisoblamoqda.
“Turkiy davlatlar tashkilotining Samarqand sammitida 10 dan ortiq hujjat imzo uchun kiritilmoqda”— Sherzod Asadov
“11-noyabr kuni Samarqandda Turkiy davlatlar tashkilotining birinchi sammiti bo‘lib o‘tadi (ushbu oliy darajadagi tadbir 2021-yil Istanbul uchrashuvida Tashkilot nomi o‘zgargandan keyingi Birinchi sammit hisoblanadi).Tadbirda 5 ta a’zo mamlakat — O‘zbekiston, Turkiya, Ozarbayjon, Qozog‘iston, Qirg‘iziston hamda 2 ta kuzatuvchi - Turkmaniston va Vengriya mamlakatlari rahbariyati ishtirok etishi kutilmoqda.
Ma’lum qilinishicha, Tashkilot doirasida siyosiy-iqtisodiy, transport, madaniyat va turizm kabi sohalarda hamkorlikni yanada jadallashtirish masalalari muhokama qilinadi. Bundan tashqari xalqaro va mintaqaviy masalalar yuzasidan fikr almashiladi.
Samarqand sammitida 10 dan ortiq hujjat imzo uchun kiritilishi rejalashtirilmoqda. Tadbirning asosiy hujjati bu — a’zo mamlakatlarning eng muhim mintaqaviy va global muammolar bo‘yicha mujassamlashgan pozitsiyalari o‘z ifodasini topgan Turkiy davlatlar tashkiloti Samarqand sammiti deklaratsiyasidir. Unda mintaqaviy barqarorlik, xavfsizlik va barqaror iqtisodiy rivojlanishni ta’minlash, transport aloqalarini mustahkamlash, shuningdek, madaniy muloqotni chuqurlashtirish bo‘yicha qo‘shma yondashuvlar belgilab berilgan.
Izoh (0)