AQSH prezidenti Donald Tramp Rossiya rahbari Vladimir Putin bilan yaqinroq munosabatlar o‘rnatish maqsadida uchrashuvni rejalashtirmoqda. Bu haqda The Atlantic nashri Amerika amaldorlariga asoslanib xabar bermoqda.
“Tramp hamon Putin bilan yaqinroq aloqalar o‘rnatishni xohlaydi va Oq uy yaqin kelajakda yana uchrashuv imkoniyatini ko‘rib chiqishi ehtimoldan xoli emas”, deya suhbatdoshlarning so‘zlarini keltiradi nashr.
Biroq manbalarga ko‘ra, ehtimoliy sammit Ukrainadagi harbiy harakatlarni to‘xtatish bo‘yicha muzokaralarni o‘z ichiga olmaydi.
Ta’kidlanishicha, Oq uy rahbari Moskva bilan munosabatlarni yaxshilashni va Rossiyaning kamyob yer elementlariga taalluqli savdo bitimini muhokama qilishni istaydi.
Avvalroq Tramp Ukrainada “shartsiz” o‘t ochishni to‘xtatishga qarshi chiqqan edi. Uning aytishicha, Putin ham go‘yoki mojaroni tugatish niyatida emas.
Tramp va Putin suhbati
19-may kuni AQSH va Rossiya rahbarlari o‘rtasida telefon orqali muloqot bo‘lib o‘tdi. Qo‘ng‘iroqdan oldin vitse-prezident Jey Di Vens suhbat chog‘ida Putindan Ukraina bilan tinchlikka jiddiy kirishish-kirmasligi so‘ralishini aytdi.
Keyinroq Putinning o‘zi suhbat ikki soat davom etganini ma’lum qildi. U suhbatni “ochiq, mazmunli va juda foydali” deb atadi. U Trampga Rossiya va Ukraina o‘rtasidagi to‘g‘ridan to‘g‘ri muzokaralarni qayta tiklashda ishtirok etayotgani uchun minnatdorlik bildirdi.
Shuningdek, Rossiya Ukraina bilan o‘t ochishni to‘xtatishni o‘z ichiga olgan memorandum ustida ishlashga tayyorligini aytdi. Tomonlar barcha tomonlarni qoniqtiradigan kelishuvlarni topishlari kerak.
Putinning memorandum haqidagi bayonotiga Zelenskiy munosabat bildirdi. U Ukraina hozircha bu borada Rossiyadan hech qanday taklif olmagani, Ukraina o‘z hududlarini bermasligini ma’lum qildi.
AQSH rahbari ham suhbat haqida ma’lumot berdi. U Rossiya va Ukraina zudlik bilan o‘t ochishni to‘xtatish va urushni tugatish bo‘yicha muzokaralarni boshlashini aytdi. AQSH prezidenti bu haqda Ukraina prezidenti, Yevropa komissiyasi raisi va boshqa Yevropa yetakchilariga ma’lum qilganini ta’kidladi.
Izoh (0)