O‘zbekiston Superligasi 20-turi doirasidagi navbatdagi ikki bahs 23-avgust, shanba kuni bo‘lib o‘tdi. Ularning birida Termizning “Surxon” klubi “Nasaf”ni qabul qilib, 1:2 hisobida imkoniyatni boy bergan bo‘lsa, ikkinchi o‘yinda Olmaliqning “OKMK” klubi “Xorazm”dan 3:1 hisobida ustun keldi.
Termizdagi uchrashuvda hisob ikkinchi bo‘limda ochildi. 58-daqiqada Dragan Cheranning bosh bilan bergan uzatmasini Husayn Norchayev golga aylantirib, “Nasaf”ni oldinga olib chiqdi. Oradan atigi 3 daqiqa o‘tib, Norchayev o‘zining dublini nishonladi. U Cheranning ajoyib pasidan so‘ng birga-bir vaziyatga chiqib, “Surxon” darvozasini ikkinchi bor ishg‘ol qildi.
Uchrashuv yakunida “Surxon” javob golini kiritdi. 90+1-daqiqada Rustam Turdimurodov “Nasaf” darvozasini ishg‘ol qilib, hisobni 1:2 ko‘rinishiga keltirdi.
Mazkur hisob o‘yinning so‘ngigacha saqlanib qoldi va “Nasaf” Termizda muhim uch ochkoni qo‘lga kiritdi. Ayni paytda qarshiliklar 43 ochko bilan turnir jadvalida 1-o‘rinni egallab turibdi. 23 ochkoga ega “Surxon” esa 9-pog‘onada bormoqda.
O‘zbekiston Superligasi
20-tur
23-avgust, shanba
“Surxon” — “Nasaf” 1:2
Gollar: 0:1 — Norchayev (58), 0:2 — Norchayev (61), 1:2 — Turdimurodov (90+1)
Kunning ikkinchi bahsi Olmaliqda bo‘lib o‘tdi. Unda “OKMK” “Xorazm”ni qabul qilib, 3:1 hisobida g‘alaba qozondi.
Uchrashuvdagi hisob 8-daqiqada ochildi. Aziz Xolmurodov raqib darvozasini ishg‘ol qilib, Olmaliq klubini oldinga olib chiqdi. 16-daqiqada Murod Bobojonov “Xorazm” safida javob golini urib, umumiy natijani 1:1 ko‘rinishiga keltirib qo‘ydi.
72-daqiqada Georgiy Papava “OKMK”ni yana hisobda oldinga olib chiqdi. 89-daqiqada esa Naoaki Senaga jamoasining uchinchi goliga mualliflik qildi va hisobni 3:1 ko‘rinishiga yetkazdi.
Shu tariqa, “OKMK” 20-turda navbatdagi muhim g‘alabasini qo‘lga kiritdi. Jamoa hozirda 37 ochko bilan Superliga turnir jadvalida 4-o‘rinda bormoqda. 19 ochkoga ega “Xorazm” esa 12-pog‘onani egallab turibdi.
O‘zbekiston Superligasi
20-tur
23-avgust, shanba
“OKMK” — “Xorazm” 3:1
Gollar: 1:0 — Xolmurodov (8), 1:1 — Bobojonov (16), 2:1 — Papava (72), 3:1 — Senaga (89)
Izoh (0)