Jo Baydenning sobiq Amerika ma’muriyati a’zolari hokimiyatda bo‘lgan to‘rt yil davomida mamlakatni vayron qilishga uringan, millionlab odamlarga AQSH hududiga noqonuniy kirishga yo‘l ochgan. Bu haqda Oq uy rahbari Donald Tramp o‘zining Truth Social ijtimoiy tarmog‘idagi sahifasida ma’lum qildi.
“Barchani Xotira kuni bilan tabriklayman. Hatto so‘nggi to‘rt yil mobaynida buzuq radikal so‘l g‘oyalar yordamida mamlakatimizni vayron qilishga urinib, 21 million kishining AQSHga faqat layoqatsiz prezident ma’qullashi mumkin bo‘lgan ochiq chegara orqali noqonuniy kirishiga yo‘l qo‘ygan “sarqitlar”ni ham”, deya ta’kidladi davlat rahbari.
Tramp amerikalik sudyalar “AQSHni mamlakatni do‘zaxga kiritishni istagan maxluqlarning qarorlaridan qutqarishiga” umid bildirgan. Shu bilan birga, Oq uy rahbari barchani qo‘rqmaslikka chaqirib, “Amerikani yana buyuk va xavfsiz qilishni” va’da berdi.
20-may kuni Tramp Bayden hokimiyatda bo‘lganida rasmiy hujjatlarni o‘zi imzolamaganini ma`lum qilgandi. AQSH prezidentining fikricha, Bayden davrida haqiqiy boshqaruvni davlat rahbarining avtomatik imzosidan foydalanish huquqiga ega bo‘lgan “radikal so‘l telbalari” amalga oshirgan.
Avvalroq AQSH Adliya vazirligi sobiq prezidentning rafiqasi Jill Baydenni, turmush o‘rtog‘ida prostata saratoni aniqlangani sababli, sudga bermoqchi ekani ma’lum bo‘lgandi. Xususan, vazirlik ta’kidlashicha, Jill turmush o‘rtog‘ining kasalligini bilgan holda, 2024-yilgi prezidentlik saylovlarida uning nomzodini qo‘yishda qat’iy turgan.
Aprel oyida Donald Tramp Rossiya va Ukraina o‘rtasidagi mojaroda AQSHning sobiq rahbari Jo Baydenni aybdor deb atagandi. Bundan oldin esa Tramp Bayden ma’muriyatini AQSH va Rossiya munosabatlarini yomonlashtirishda ayblagandi.
Izoh (0)