Ukraina prezidenti Vladimir Zelenskiy Rossiya bilan asirlarni almashish bo‘yicha “1000 ga 1000” formatida yig‘ilish o‘tkazdi. Bu haqda prezidentning o‘zi ijtimoiy tarmoqlarda ma’lum qilgan.
“Ayirboshlashga tayyorgarlik ko‘rish bo‘yicha yig‘ilish o‘tkazdim. Rossiya asirligidan 1000 nafar fuqaromizni ozod qilish to‘g‘risidagi kelishuv Turkiyadagi uchrashuvning deyarli yagona amaliy natijasi bo‘ldi. Bu natijani ta’minlash uchun harakat qilmoqdamiz”, dedi u.
Zelenskiyning aytishicha, yig‘ilish davomida Rossiya tomoni bilan aloqalar bo‘yicha ma’ruzalar tinglangan. U almashinuv jarayonini Ukraina Mudofaa vazirligi rahbari Rustem Umerov nazorat qilayotganini qo‘shimcha qilgan. Bundan tashqari, jarayonga Xavfsizlik xizmati, Tashqi razvedka xizmati, Ichki ishlar vazirligi, Oliy Radaning inson huquqlari bo‘yicha vakili va Prezident devoni jamoasi jalb etilgan.
Bundan oldin Rossiya prezidenti matbuot kotibi Dmitriy Peskov barcha tomonlar o‘rtasida mahbuslar almashinuvi imkon qadar tezroq amalga oshirilishidan manfaatdor ekanligini ma’lum qildi. Shuningdek, Rossiya tomoni Kiyevga “mingga ming” formulasi asosida almashtirishga taklif etilgan shaxslar ro‘yxatini topshirganini tasdiqlab, Ukraina tomonidan ham shu kabi ro‘yxat kutilayotganini bildirdi.
“Biz haqiqatan ham o‘z ro‘yxatimizni topshirdik. Kiyevdan hozircha javob ro‘yxati kelmadi. Kutmoqdamiz”, deya ta’kidladi u.
Ushbu formatda asirlarni almashish bo‘yicha kelishuvga Rossiya Federatsiyasi va Ukrainaning so‘nggi uch yil ichidagi birinchi muzokaralarida erishilgan.
Istanbul muzokaralari
10-may kuni Ukraina prezidenti Vladimir Zelenskiy Kiyevda Yevropaning to‘rt davlati rahbarlarini qabul qildi. Sammit yakunida ular qo‘shma bayonot qabul qilib, unda Rossiyadan kamida 30 kun davomida so‘zsiz o‘t ochishni to‘xtatishni talab qildi va yangi sanksiyalar bilan tahdid soldi.
Oradan bir necha soat o‘tib, 11-mayga o‘tar kechasi Rossiya prezidenti Vladimir Putin Kremlda jurnalistlarni to‘plab, Istanbulda 2022-yil bahorida to‘xtab qolgan muzokaralar 15-maydan bir tomonlama tartibda qayta tiklanishini e’lon qildi.
Shundan so‘ng Zelenskiy Turkiyaga kelishini, lekin faqat Putin bilan muzokara olib borishini aytdi. Kreml 14-mayga o‘tar kechasi Rossiya delegatsiyasi tarkibini e’lon qildi. Unga Medinskiy boshchilik qildi.
Rossiya delegatsiyasi 15-may kuni ertalab Istanbulga uchib keldi. Shu kuni tushdan keyin Vladimir Zelenskiy Ukraina rasmiylari bilan birga Turkiya rahbari Rajab Toyyib Erdo‘g‘on bilan muzokaralar o‘tkazish uchun Anqaraga uchib keldi. Uch soatga yaqin davom etgan uchrashuvdan so‘ng Zelenskiy Umerov boshchiligidagi Ukraina delegatsiyasini muzokaralarda ishtirok etish uchun Istanbulga yuborishga roziligini bildirdi.
Istanbulda 16-may kuni Rossiya va Ukraina delegatsiyalari o‘rtasida 2022-yil bahoridan beri birinchi muzokaralar o‘tkazildi. Tomonlar o‘t ochishni to‘xtatish bo‘yicha kelishuvga erisha olmadi, ammo eng yirik asirlar almashinuvini amalga oshirishga kelishib oldi.
Izoh (0)