Rossiya Ukrainaga qarshi urushda millionga yaqin harbiy xizmatchisini yo‘qotdi. Bu haqda Ukraina Qurolli kuchlari bosh shtabi ma’lum qildi.
Ukraina halok bo‘lganlar yoki yaradorlar soniga aniqlik kiritmagan, ammo yuqoridagi raqam barcha yo‘qotishlarni o‘z ichiga oladi: halok bo‘lganlar, yaradorlar, bedarak yo‘qolganlar va asirga olinganlar. Ukraina rasmiylari urush boshlanganidan beri Rossiya qo‘shinlari va texnikasining yo‘qotishlarini kunlik kuzatib bormoqda. Tomonlar o‘z yo‘qotishlarini rasman e’lon qilmayapti.
Fevral oyida Ukraina prezidenti Vladimir Zelenskiy urush boshlanganidan beri jang maydonida 46 mingdan ortiq ukrainalik askar halok bo‘lganini aytgandi. 380 mingga yaqin ukrainalik askar yaralangan, “o‘n minglab” askarlar esa bedarak yo‘qolgan yoki Rossiya asirligida qolmoqda.
2024-yil oxirida Rossiya mudofaa vaziri o‘rinbosari Anna Sivileva bedarak yo‘qolgan askarlarning qarindoshlaridan DNK-test o‘tkazish uchun 48 mingta ariza olinganini aytgandi. Ukraina harbiylari Rossiya yozda yangi hujumga tayyorgarlik ko‘rayotganini prognoz qilmoqda. Ukrainaning bir necha viloyatlari orqali 1000 kilometrdan ortiq masofaga cho‘zilgan front chizig‘i bo‘ylab jangovar harakatlar faollashgan.
Amerikaning “Urushni o‘rganish instituti” tahliliy markazi ta’kidlashicha, Moskva bir necha oydan beri Donetsk viloyatining Kiyev nazorati ostida qolgan qismini egallashga intilmoqda. Bu Rossiyaning 2014-yilda Ukrainaga ilk bor bostirib kirganidan beri uning asosiy strategik maqsadlaridan biri bo‘lib kelmoqda.
Izoh (0)