O‘zbekistonga sifati kafolatlanmagan 5,3 milliard so‘mlik dori vositalarini noqonuniy olib kirgan shaxslarga jinoyat ishi qo‘zg‘atildi. Bu haqda DXX matbuot xizmati xabar berdi.
Ma’lum qilinishicha, Rossiya va Qozog‘istondan O‘zbekistonda faoliyat yurituvchi mas’uliyati cheklangan jamiyatlar nomiga yuborilgan tovarlar ortilgan 2 ta “GAZ” yuk mashinasi Toshkent viloyatidagi “Yallama” chegara-bojxona postiga “qizil yo‘lak”da kirib kelganidan so‘ng, ularni to‘liq bojxona ko‘rigidan o‘tkazish maqsadida bojxona xodimi kuzatuvi ostida, belgilangan manzil bojxona postiga yo‘naltirilgan. Lekin yarim yo‘lda bojxona xodimi mashinalarni belgilangan manzilgacha kuzatib bormasdan, ularni nazoratsiz qoldirib, erkin harakatlanishiga qo‘yib bergan.
Bundan foydalangan haydovchilar yo‘nalishni o‘zgartirib, Yuqori Chirchiq tumanida yashovchi, 1966-yilda tug‘ilgan fuqaroning xonadoniga borgan. So‘ngra Rossiya va Qozog‘istondan kitob, aksessuar va kiyim-kechaklar orasiga yashirgan holda olib kelingan, tegishli hujjatlari bo‘lmagan, “Aktovegin”, “Kleksan”, “Remaksol” kabi 214 nomdagi jami 52 459 dona dori vositalarini yuk mashinasiga o‘rnatilgan bojxona muhrini buzmagan holda xonadonga tushirib, belgilangan manzil bojxona posti tomon yo‘lga chiqqanida ular Davlat xavfsizlik xizmati hamda Bojxona qo‘mitasining shaxsiy xavfsizlik boshqarmasi xodimlari tomonidan ushlangan.
Sifati kafolatlanmagan ushbu dori vositalarining umumiy qiymati 5 milliard 353 million so‘mni tashkil etgan.
Tergovga qadar tekshiruv davomida, hozirda shaxsiga aniqlik kiritilayotgan Qozog‘iston fuqarosi mazkur tovarlarni qo‘shni davlatdan O‘zbekistonga o‘tkazib berishlari evaziga yuk avtomashinalari haydovchilariga 2000 dollar va’da qilgani ma’lum bo‘ldi.
Hozirda yuk mashinalari haydovchilari va dori vositalari tushirilgan Yuqori Chirchiq tumanidagi xonadon egasiga nisbatan Jinoyat kodeksining 182-moddasi (bojxona to‘g‘risidagi qonunchilikni buzish) 2-qismi “a” bandi bilan jinoyat ishi qo‘zg‘atilib, tergov harakatlari olib borilmoqda.
Shuningdek, xizmat majburiyatini to‘laqonli bajarmay, xorijdan noqonuniy olib kelingan dori vositalarini yuk mashinalaridan tushirib qoldirilishiga imkon yaratgan “Yallama” chegara-bojxona posti inspektorining xatti-harakatlariga nisbatan tergov davomida huquqiy baho beriladi.
Jinoyat kodeksiga ko‘ra, Bojxona to‘g‘risidagi qonunchilikni buzish (juda ko‘p miqdorda) BHMning 300 yuz baravaridan 600 baravarigacha (112,5 million so‘mdan 225 million so‘mgacha) miqdorda jarima yoki 3 yilgacha axloq tuzatish ishlari yoxud 5 yildan 8 yilgacha ozodlikdan mahrum qilish bilan jazolanadi.
2025-yilning boshlarida Jizzaxda 588 million so‘mlik sifati kafolatlanmagan dorilar sotuvga chiqib ketishining oldi olingandi.
Izoh (0)