AQSH prezidenti Donald Tramp Ukrainaga qilingan eng yirik aviahujum sababli Rossiya rahbarini tanqid qilib, uni “butunlay aqldan ozgan” deb atagandi. Rossiya prezidenti matbuot kotibi Dmitriy Peskov mazkur tanqidlarga munosabat bildirdi.
Peskovga ko‘ra, AQSHning Rossiya va Ukraina o‘rtasidagi muzokaralarni boshlash uchun “juda katta sa’y-harakatlar” ko‘rsatgani “hissiy zo‘riqishni” keltirib chiqargan.
Shubhasiz, Amerika tomoni juda katta kuch sarflagan muzokaralar jarayonining boshlanishi juda muhim yutuqdir. Biz amerikaliklarga va shaxsan prezident Trampga muzokaralar jarayonini tashkil etish va boshlashda ko‘rsatgan ko‘magi uchun minnatdormiz. Bu juda mas’uliyatli jarayon bo‘lib, u barcha odamlarning mutlaq hissiy zo‘riqishi va hissiy munosabatlari bilan kechadi. Biz barcha reaksiyalarni sinchkovlik bilan kuzatib bormoqdamiz, degan Peskov.
U Rossiya xavfsizligini ta’minlash uchun prezident Putin “zarur bo‘lgan qarorlarni qabul qilayotgani”ni ta’kidladi. Peskov bunga Ukrainaning 9-may kuni Moskvadagi G‘alaba paradida jahon yetakchilarining xavfsizligi haqidagi bayonotlarini misol qilib keltirdi.
Uning so‘zlariga ko‘ra, ko‘plab yetakchilar “dronlar bilan hujum qilishga urinish”ning bevosita guvohi bo‘lgan va bu holatlar hozirgacha davom etmoqda. U shuningdek, Ukraina Rossiyaning “ijtimoiy va tinch infratuzilmasiga zarba berayotgani”, Moskva esa bunga javoban “harbiy nishonlarga zarba berayotganini” da’vo qilgan.
Izoh (0)