AQSH prezidenti Donald Tramp Rossiya prezidenti Vladimir Putinga ikki haftalik muhlat qo‘ygani aytilmoqda. Prezident bu muddat ichida natija bo‘lmasa, boshqa chora ko‘rishini bildirgan. Bu haqda BBC xabar berdi.
Tramp 28-may kuni Oq uyda Putin urushni tugatishni xohlash-xohlamasligi haqida berilgan savolga shunday javob bergan:
“Men bunga hozir javob bera olmayman, lekin taxminan ikki haftadan keyin aytishim mumkin. Shu muddat ichida Putin bizni aldab yuribdimi yoki yo‘qligini bilib olamiz”, degan u.
Tramp so‘nggi paytlarda ijtimoiy tarmoqlarda Rossiya prezidenti “mutlaqo aqldan ozgan” va “olov bilan o‘ynashmoqda” deb yozgandi.
Rossiya tomonidan amalga oshirilayotgan bombardimonlar to‘rtinchi yil davom etmoqda. Rossiyaning Kiyevga uyushtirgan oxirgi zarbalarida kamida 13 kishi halok bo‘lib, yana o‘nlab odam, jumladan, bolalar jarohatlangan.
Trampning yuqoridagi gaplari uning tobora kuchayib borayotgan noroziligidan darak beradi. Chunki Oq uy Rossiya va Ukraina o‘rtasida tinchlik kelishuvi bo‘yicha muzokaralarni olib borishga bir necha bor urinib ko‘rgan, ammo bu urinishlar samara bermagan.
Tramp prezidentlikka kelganidan beri, Vashington Ukrainaga nisbatan bosimni kuchaytirgan. Bu, jumladan, mart oyida AQSH tomonidan sakkiz kun davomida harbiy yordam va razvedka ma’lumotlari almashinuvining to‘xtatilishini o‘z ichiga oladi.
28-may kuni Germaniyaning yangi kansleri Fridrix Mers Ukrainaga uzoq masofali raketalarni ishlab chiqarishda yordam berishini bildirdi. Kreml esa, Ukrainaga cheklovlarsiz qurol berilishi siyosiy kelishuvlarga zarar yetkazadi, deb ogohlantirdi.
Rossiyaning qarshiligiga qaramay, Tramp tinchlikka oid talablari bo‘yicha pozitsiyasini yumshatdi — u dastlab 30 kunlik zudlik bilan o‘t ochishni to‘xtatish chorasi talab qilgan (bunga faqat Ukraina rozi bo‘lgan). Endilikda u Putinga yuzma-yuz sammit taklif qilmoqda va bu orqali murosaga erishilishi mumkinligini aytmoqda. Diplomatik sa’y-harakatlar kontekstida Tramp Vladimir Zelenskiy va Vladimir Putin bilan ehtimoliy uchrashuvga tayyorligini ma’lum qilgan.
“Men bu uchrashuv yana bir-ikki oy oldin bo‘lib o‘tishini istardim. Hozir biz Putin bilan ishlayapmiz va bu nimaga olib kelishini ko‘ramiz,” deya qo‘shimcha qildi u.
Ukraina prezidenti Vladimir Zelenskiy esa Moskvani tinchlik jarayonini atayin cho‘zayotganlikda ayblagan va Istanbulda o‘tkazilgan muzokaralardan so‘ng va’da qilingan tinchlik memorandumini Rossiya hali ham taqdim etmaganini ta’kidlagan. Kreml vakili Dmitriy Peskov esa hujjat “yakuniy bosqichda” ekanini ma’lum qilgan.
Izoh (0)