Ukraina Tashqi razvedka xizmati rahbari Oleg Ivashchenkoning aytishicha, Xitoy Rossiyaga harbiy maqsadlarda ishlatiladigan komponentlarni tizimli ravishda yetkazib bermoqda. “Ukrinform” agentligi xabariga ko‘ra, gap porox, maxsus kimyoviy moddalar, texnik uskunalar va dastgohlar haqida boryapti. Da’vo qilinishicha, Rossiyaning kamida 20 ta harbiy sanoat korxonasi bu hamkorlikdan foyda ko‘ryapti.
“Ishonchli ma’lumotlarga ko‘ra, Xitoy maxsus kimyoviy moddalar, texnologik uskunalar, porox va boshqa komponentlarni to‘g‘ridan-to‘g‘ri yetkazib bermoqda. Rossiyaning 20 ta korxonasi bu jarayonda ishtirok etayotgani tasdiqlangan,” dedi Ivashchenko.
Ukraina mulozimiga ko‘ra, 2024–2025-yillarda Xitoy va Rossiya o‘rtasida aviatsiyaga oid kamida beshta hamkorlik holati qayd etilgan. Xususan, rus korxonalariga uskuna, ehtiyot qismlar va texnik hujjatlar yuborilgan. Bundan tashqari, maxsus kimyoviy moddalar bilan bog‘liq oltita keys ham qayd etilgan.
Oleg Ivashchenkoning ma’lum qilishicha, joriy yil holatiga Rossiya dronlarida qo‘llanilayotgan muhim elektron komponentlarning 80 foizgacha qismi Xitoydan keltirilmoqda. Ayrim holatlarda bunday mahsulotlar uchinchi davlatlar orqali yetkazib berilyapti. Jarayonda yolg‘on nomlar, soxta hujjatlar va qobiq kompaniyalar ishga solinib, asl manba yashirilmoqda.
Xitoyning Rossiyaga yordami
Donetsk uchun aprel oyidagi janglar payti ukrainaliklar Rossiya tomonida jang qilayotgan ikki nafar Xitoy fuqarosini qo‘lga oldi. Oradan ko‘p o‘tmay voqeaga Ukraina prezidenti ham aralashib, rus armiyasi safida jang qilayotgan xitoyliklar soni ancha ko‘pligini ma’lum qildi.
“Xitoyliklar masalasi” jiddiy. Hozirda bizda 155 nafar kishi haqida ma’lumot bor — ularning familiyalari, pasport ma’lumotlari mavjud. Bu 155 kishi Xitoy fuqarolari bo‘lib, Ukraina hududida ukrainaliklarga qarshi jang qilmoqda... Biz bu borada ma’lumot to‘playapmiz va ularning soni bundan ham ko‘proq, deb hisoblaymiz. Shu 155 kishi haqida barcha tafsilotlar bor: qayerdanligi, xitoy hujjatlari, yoshi va hokazo. Ularning xizmat qilayotgan joylari ham aniq: 70, 71, 255-motorlashgan miltiq polklari va shunga o‘xshash bo‘linmalar, degan edi Zelenskiy.
Keyinroq asir olingan ikki nafar xitoylik jamoatchilik vakillari bilan yuzlashtirildi. Ular Rossiya armiyasi safiga ko‘ngilli sifatida qo‘shilgani, bunda Pekinning aloqasi yo‘qligini ta’kidladi.
Izoh (0)