Xalqaro Olimpiya Qo‘mitasi (XOQ) 2026-yil Italiyada bo‘lib o‘tadigan qishki Olimpiya o‘yinlarida Rossiya jamoalari, jumladan milliy xokkey terma jamoasi ham ishtirok eta olmasligini rasman tasdiqladi. Bu haqda tashkilot 27-may kuni bayonot berdi.
XOQning ma’lum qilishicha, bu qaror Rossiyaning Ukrainaga qarshi davom etayotgan harbiy harakatlari sabab qabul qilingan. 2023-yil mart oyida berilgan tavsiyalar hanuz o‘zgarishsiz qolmoqda. Shu bois, hatto neytral bayroq ostida ham Rossiya jamoalari ishtirokiga ruxsat berilmaydi.
Avvalroq Rossiya matbuotida Rossiya Xokkey federatsiyasi bilan Xalqaro xokkey federatsiyasi (XXF) o‘rtasida muzokaralar bo‘layotgani haqida xabarlar chiqqandi. Ammo XOQning qo‘shimcha qilishicha, XXF Xalqaro Olimpiya Qo‘mitasining tavsiyalariga rioya qilishi shart va Rossiya jamoalari 2026-yilgacha barcha turdagi Xokkey musobaqalaridan chetlatilishi kerak.
2023-yil oktabr oyida XOQ Rossiya Olimpiya Qo‘mitasi (ROQ) a’zoligini ham to‘xtatgan edi. Bunga sabab — Rossiyaning bosib olingan Ukraina hududlarida “mintaqaviy olimpiya kengashlari”ni tan olgani bo‘lgan.
2025-yil mart oyida XOQning yangi prezidenti Kirsi Koventri mamlakatlarni siyosiy sabablar bilan Olimpiadadan chetlatishga qarshi ekanini bildirgan bo‘lsa-da, amaldagi qaror o‘z kuchida qolmoqda.
Eslatib o‘tamiz, 2024-yilgi Parijdagi yozgi Olimpiadada oz sonli rossiyalik va belaruslik sportchilarga neytral maqomda qatnashishga ruxsat berilgan edi.
Izoh (0)