Pentagon muhojirlarni AQSHning Guantanamodagi harbiy-dengiz bazasida joylashgan qamoqxonaga tashish uchun millionlab dollar sarflagan. Bu haqda NBC News telekanali xabar bermoqda.
“AQSH prezidenti Donald Tramp ma’muriyati 20 yanvardan 8 aprelgacha bo‘lgan davrda muhojirlarni Guantanamo qamoqxonasiga harbiy samolyotlarda tashish uchun kamida 21 million dollar sarflagan. Bu AQSH harbiylari Kongressga taqdim etgan ma’lumotlarga asoslanadi”, deyiladi xabarda.
AQSH harbiy-dengiz xizmati vakilining aytishicha, hozirda qamoqxonada atigi 32 nafar muhojir saqlanmoqda. Bu Tramp qamoqxonaga joylashtirmoqchi bo‘lgan 30 ming muhojirning arzimas qismini tashkil etadi.
Telekanalning ta’kidlashicha, Amerika prezidenti ushbu tashabbusni e’lon qilganidan beri Guantanamoga jami 500 ga yaqin muhojir borgan, ularning ko‘pchiligi keyinchalik AQSHga qaytarilgan.
Ma’lumotlarga ko‘ra, Guantanamoga parvoz qilayotgan harbiy samolyotlar uchun bir soatlik parvozning o‘rtacha narxi 26 ming dollardan ortiqni tashkil etgan. Trampning Demokratik partiyadagi muxoliflari uning tashabbusini qoralab, uni “behuda siyosiy nayrang” va “harbiy ehtiyojlar uchun ajratilgan mablag‘larni bekorga sarflash” deb atashgan.
Trampning migratsiya siyosati
Tramp 21-yanvar kuni chegaradagi barcha noqonuniy o‘tish joylari yopilishini ta’kidladi. U AQSH janubiy chegarasi orqali noqonuniy migrantlarning kirishini taqiqlash to‘g‘risidagi farmonni imzoladi. Boshpana izlash bahonasi bilan u yerda qolish huquqini chekladi.
Prezident Ichki xavfsizlik vazirligi, Adliya vazirligi va Davlat departamentiga AQSHga janubdan noqonuniy kirayotganlarni chiqarib yuborish choralarini ko‘rishni topshirdi. Pentagon chegaraga qo‘shimcha 1,5 ming askar va vertolyotlar yuborilishini e’lon qildi. Shuningdek, 5 mingdan ortiq noqonuniy migrantlarni deportatsiya qilish uchun aviatsiya taqdim etiladi, ularning oqimi va noqonuniy savdosini to‘xtatish uchun vaqtinchalik va doimiy to‘siqlar quriladi.
Meksika prezidenti AQSHga borish uchun uning mamlakatiga kelayotgan noqonuniy migrantlar o‘z vatanlariga qaytarib yuborilishini aytdi. Meksika AQSHdan noqonuniy migrantlarni olib kelayotgan harbiy transport samolyotini qabul qilishdan bosh tortdi.
AQSH prezidenti Donald Tramp mamlakatdan ketadigan noqonuniy muhojirlarga 1000 dollardan tashqari bepul aviachipta berilishini aytdi.
Izoh (0)