AQSHda Pizza Hut franshizasining sobiq egasi o‘zini Xudoning elchisi deb tanishtirgan firibgarlarga 60 million dollardan ortiq pul berdi. Bu haqda New York Post xabar qilmoqda.
Ma'lum qilinishicha, Oklaxoma federal sudiga 91 yoshli “taqvodor xristian” va sobiq tadbirkor Jin Biknellni diniy usullar bilan aldab, o‘zlarini Xudoning elchilari sifatida ko‘rsatib, 60 million dollarga chuv tushurganlar haqida da’vo arizasi topshirilgan.
Nashrning yozishicha, Floridada istiqomat qilgan Biknell Oklaxoma shtatining Vinita shahrida joylashgan American Heartland mavzuli bog‘i loyihasi bilan bog‘liq keng ko‘lamli firibgarlik sxemasiga aralashgan. Disneylendga raqobatchi sifatida mo‘ljallangan loyiha amalga oshmagan. Zamonaviy akvapark, mehmonxona va kempingga ega bo‘lishi kerak bo‘lgan bog‘ o‘rniga faqat shag‘al yo‘l va devor paydo bo‘lgan.
Da’vogarning ta’kidlashicha, firibgarlik bir necha yil davomida “ilohiy vahiylar” niqobi ostida amalga oshirilgan. Ishning asosiy aybdorlari sifatida Missuridan kelgan voiz Larri Uilhayt, shuningdek, tadbirkorlar Richard Silanskas va Stiven Xedrik ko‘rsatilgan. Ular Biknellga go‘yoki Xudodan kelgan elektron xabarlar yuborish orqali “ruhiy ta’sir o‘tkazish”da ayblanmoqda.
Sud hujjatlarida aytilishicha, jinoyatchilar “Biknellni Xudoning irodasini bajarayotganiga ishontirgan” va uni yer sotib olish hamda loyihani rivojlantirish uchun millionlab sarmoya kiritishga undagan. Pizza Hut franshizasining sobiq egasi, kamtar oiladan chiqqan Biknell bog‘ning ilohiy vazifasiga ishonib, unga butun mol-mulkini sarflagan.
Biroq, da’vo arizasida ta’kidlanishicha, mablag‘lar maqsadsiz ishlatilgan. Tergov ma’lumotlariga ko‘ra, pullarning bir qismi ayblanuvchilar va ularning oila a’zolarining shaxsiy ehtiyojlariga sarflangan. Natijada, bir necha yil ichida loyiha dastlabki yer qazish ishlaridan nariga o‘tmagan.
Biknellning advokatlari firibgarlik sxemasi uning sog‘lig‘iga jiddiy zarar yetkazganini ta’kidlamoqda. Keksa erkak insult o‘tkazgan, shuningdek, unga og‘ir ruhiy buzilish tashxisi qo‘yilgan.
Da’vogar sud hay’ati tayinlanishini va miqdori ko‘rsatilmagan zarar qoplanishini talab qilmoqda.
Izoh (0)