AQSH Markaziy qo‘mondonligi (CENTCOM) USS Carl Vinson aviatashuvchisi Yaqin Sharqqa kelganini ma’lum qildi. U yana bir aviatashuvchi USS Harry S.Truman bilan birga harbiy harakatlarda qatnashmoqda.
CENTCOM tomonidan X ijtimoiy tarmog‘ida e’lon qilingan videoda F-35C qiruvchi samolyotlari turli bombalar bilan jihozlanayotgani va kema palubasidan havoga ko‘tarilayotgani tasvirlangan.
USS Carl Vinson (CVN 70) aviatashuvchisining F-35C Lightning II qiruvchi samolyotlaridan iborat havo qanoti USS Harry S.Truman (CVN 75) kemasi bilan AQSH Markaziy qo‘mondonligi hududida hamkorlik qilyapti, deyiladi xabarda.
Bu Qo‘shma Shtatlarning Yaman husiylariga qarshi harbiy kampaniyasi doirasida amalga oshirilmoqda. AQSH harbiylari Donald Trampning buyrug‘i bilan15-martdan boshlab Yamanga zarbalarini kuchaytirdi.
Al Arabiya telekanalining o‘z manbalariga tayanib ma’lum qilishicha, AQSH harbiy havo kuchlari hamda dengiz floti birgina o‘tgan oyning ichida husiylarga tegishli ekani aytilgan 100 dan ortiq nishonga zarba berdi. Pentagon rahbari Pit Xegset esa Yaqin Sharqqa qo‘shimcha aviatsiya bo‘linmalari va havo mudofaa tizimlarini yuborishni buyurdi.
Uning topshirig‘i ortidan USS Carl Vinson aviatashuvchisi Hind—Tinch okeani mintaqasidan olib kelindi. Uning Yaqin Sharqqa yo‘naltirilishiga mintaqadagi taranglik sabab ekani aytilmoqda.
Bundan tashqari, AQSH mintaqadagi kuchlarini himoyalash uchun Patriot va yanada qudratliroq THAAD tizimlarini ham olib kelgan. Pentagon THAAD kompleksining joylashuvi haqida ma’lumot bermadi. Biroq taxminlarga ko‘ra, u Isroilga yuborilgan bo‘lishi mumkin.
Izoh (0)