Qaysi hududda nikohdan ajralishlar eng ko‘p kuzatilayotgani maʼlum qilindi

Mamlakatda joriy yil I yarmida nikohdan ajralganlar soni 2024-yil mos davridagidan 871 taga ko‘paydi. Bu haqda Statistika qo‘mitasi maʼlum qildi.

2025-yil yanvar-iyun oylarida O‘zbekistonda 23 ming 338 oila nikohdan ajraldi. Olti oy davomida ajralishlar soni eng ko‘p hudud Toshkent shahri bo‘ldi — 2 962 ta.

Shu bilan birga, Toshkent (2 330 ta), Farg‘ona (2 551 ta), Andijon (2 437 ta), Samarqand (2 242 ta) viloyatlarida nikoh tugatilishi nisbatan ko‘p kuzatilgan. Eng kam ajralishlar Navoiy viloyatida (682 ta) qayd etilgan. Qolgan hududlardagi ko‘rchatkichlar quyidagicha:

• Namangan viloyati — 2 116 ta;
• Buxoro viloyati — 1 213 ta;
• Qashqadaryo viloyati — 1 689 ta;
• Surxondaryo viloyati — 1 510 ta;
• Xorazm viloyati — 969 ta;
• Qoraqalpog‘iston — 933 ta;
• Jizzax viloyati — 930 ta;
• Sirdaryo viloyati — 774 ta.

Taqqoslash uchun, 2024-yil yanvar-iyun oylarida O‘zbekiston bo‘yicha 22 467 oila nikohdan ajralgan. Olti oy davomida Toshkent shahrida eng ko‘p ajralish qayd etilgan (2 935 ta). Eng kam nikoh buzilishi Navoiy viloyatida bo‘lgan (588 ta).