AQSH Mudofaa vazirligi Yaqin Sharqqa USS Carl Vinson aviatashuvchi kemasini jo‘natmoqda. Bu haqda Pentagon rasmiy vakili Shon Parnell ma’lum qildi.
Mazkur aviatashuvchi ilgari Qizil dengizda bir necha bor husiylar hujumiga uchragan USS Harry S. Truman aviatashuvchisiga qo‘shiladi.
Hind-Tinch okeani mintaqasidagi rejali mashg‘ulotlar yakunlangach, USS Carl Vinson boshchiligidagi aviatashuvchi zarbdor guruhi mintaqaviy barqarorlikni mustahkamlash, tajovuzkorlikni to‘xtatish va savdo yo‘llarining xavfsizligini ta’minlash uchun AQSH Markaziy qo‘mondonligi (CENTCOM) mas’ul hududga yetib boradi, dedi Parnell.
AQSH prezidenti Donald Tramp ma’muriyatiga yaqin manbalarning Express gazetasiga ma’lum qilishicha, agar Eron yadroviy kelishuvga rozi bo‘lmasa va o‘zining yadroviy dasturini to‘xtatishni boshlamasa, “sentyabr oyigacha mavjud bo‘lmay qolishi” mumkin.
Ha, prezident Trampga foydali kelishuv tuzish imkoniyatini berish istagi bor, biz ham urushdan ko‘ra bunday kelishuvni afzal ko‘ramiz. Biroq harbiy variant hamon mavjud va qaror qabul qilish vaqti yaqinlashmoqda, dedi manba.
USS Carl Vinson to‘rtta raketalarini ishga tushirish qurilmalari bilan jihozlangan. U 90 tagacha samolyot va vertolyot tashish imkoniyatiga ega.
Shuningdek, AQSH allaqachon Buyuk Britaniya nazoratidagi Diyego-Garsiya oroliga (Chagos arxipelagi) oltita B-2 Spirit strategik ko‘rinmas bombardimonchi samolyotlarini joylashtirgan. Ushbu bombardimonchilar Eronning harbiy va yadroviy obyektlarini yo‘q qilishga qodir bo‘lgan bunkerga qarshi o‘q-dorilarni olib yurishga qodir.
Ularning harakatlarini Diyego-Garsiya bazasidagi oltita Stratotanker yonilg‘i quyish samolyotlari qo‘llab-quvvatlashi mumkin. Bu AQSH harbiy-havo kuchlariga Eronga zarba berish bo‘yicha uzoq masofali operatsiyalarni amalga oshirish va dastlabki pozitsiyalarga qaytish imkonini beradi.
AQSH prezidenti tahdidi va Eron javobi
Tramp mart oyi boshida Eron oliy rahnamosiga maktub yo‘llab, unga yangi yadroviy kelishuv tuzish uchun ikki oy muhlat bergan edi. Maktubda yangi yadroviy bitim bo‘yicha muzokaralar o‘tkazish qat’iy talab qilingan. AQSH maktub mazmuni haqida bir necha ittifoqchisini, jumladan Isroil, Saudiya Arabistoni va Birlashgan Arab Amirliklarini ham xabardor qilgan.
Eron oliy rahnamosi 12-mart kuni maktubni olgach, Trampning muzokaralar haqidagi taklifini “aldov” deb atadi. 30-mart kuni esa Eron prezidenti Mas’ud Pezeshkiyon maktubga javoban AQSH bilan ikki tomonlama muzokaralar o‘tkazishdan bosh tortdi. Tehron Vashington bilan yadro dasturi bo‘yicha muloqot faqat uchinchi davlatlar vositachiligida amalga oshirilishi mumkinligini ta’kidlagan.
Ikki tomon o‘rtasida to‘g‘ridan to‘g‘ri muzokaralar o‘tkazish imkoniyati rad etilgan bo‘lsa-da, bilvosita muzokaralar uchun yo‘l ochiqligi ta’kidlandi, degan Eron prezidenti
Bunga javoban Tramp agar kelishuv bo‘lmasa, Eronni bombardimon qilish bilan tahdid qildi.
Agar ular kelishuvga erishmasa, unda bombardimon bo‘ladi. Bu ular hech qachon ko‘rmagan bombardimon bo‘ladi, degan AQSH rahbari.
Izoh (0)