AQSH prezidenti Donald Tramp mamlakatning janubiy chegarasi orqali noqonuniy migrantlarning kirishini taqiqlash to‘g‘risidagi farmonni imzoladi. Chegaraga qo‘shimcha 1,5 ming askar va vertolyotlar yuboriladi. Bu haqda Pentagon xabar berdi.
Tramp janubiy chegara orqali kirib kelgan muhojirlarning boshpana izlash bahonasi bilan u yerda qolish huquqini chekladi. U Ichki xavfsizlik vazirligi, Adliya vazirligi va Davlat departamentiga AQSHga janubdan noqonuniy kirayotganlarni chiqarib yuborish choralarini ko‘rishni topshirdi.
“Mudofaa vazirligi janubi-g‘arbiy chegarani kuchaytiradi, u yerga qo‘shimcha ravishda 1,5 ming harbiy xizmatchi, shuningdek, aniqlash va monitoring tadbirlarini qo‘llab-quvvatlash uchun ekipajlar va razvedka tahlilchilari bo‘lgan vertolyotlar joylashtiriladi”, deyiladi Pentagon rahbari vazifasini bajaruvchi Robert Seyless.
U shu tariqa chegarada quruqlikdagi kuchlarning mavjudligi Tramp lavozimga kirishganidan beri 60 foizga oshirilishini aytdi.
Pentagon, shuningdek, 5 mingdan ortiq noqonuniy migrantlarni deportatsiya qilish uchun aviatsiya taqdim etadi, ularning oqimi va noqonuniy savdosini to‘xtatish uchun vaqtinchalik va doimiy to‘siqlarni qurishda yordam ko‘rsatadi.
- The Washington Post gazetasi o‘z ixtiyoridagi hujjatga tayanib, Tramp Meksika bilan chegaraga qo‘shimcha 10 ming harbiy xizmatchini yuborish niyatida ekanini yozdi.
- CNN manbalarga tayanib, AQSH-Meksika chegarasida milliy gvardiyaning 4,5 ming jangchisi ham joylashtirilganini ma’lum qildi.
- Tramp 21-yanvar kuni AQSH janubiy chegarasida favqulodda holat e’lon qilish to‘g‘risidagi farmonni imzolagandi. U chegaradagi barcha noqonuniy o‘tish joylari yopilishini aytgan.
Izoh (0)