Пентагон муҳожирларни АҚШнинг Гуантанамодаги ҳарбий-денгиз базасида жойлашган қамоқхонага ташиш учун миллионлаб доллар сарфлаган. Бу ҳақда NBC News телеканали хабар бермоқда.
“АҚШ президенти Дональд Трамп маъмурияти 20 январдан 8 апрелгача бўлган даврда муҳожирларни Гуантанамо қамоқхонасига ҳарбий самолётларда ташиш учун камида 21 миллион доллар сарфлаган. Бу АҚШ ҳарбийлари Конгрессга тақдим этган маълумотларга асосланади”, дейилади хабарда.
АҚШ ҳарбий-денгиз хизмати вакилининг айтишича, ҳозирда қамоқхонада атиги 32 нафар муҳожир сақланмоқда. Бу Трамп қамоқхонага жойлаштирмоқчи бўлган 30 минг муҳожирнинг арзимас қисмини ташкил этади.
Телеканалнинг таъкидлашича, Америка президенти ушбу ташаббусни эълон қилганидан бери Гуантанамога жами 500 га яқин муҳожир борган, уларнинг кўпчилиги кейинчалик АҚШга қайтарилган.
Маълумотларга кўра, Гуантанамога парвоз қилаётган ҳарбий самолётлар учун бир соатлик парвознинг ўртача нархи 26 минг доллардан ортиқни ташкил этган. Трампнинг Демократик партиядаги мухолифлари унинг ташаббусини қоралаб, уни “беҳуда сиёсий найранг” ва “ҳарбий эҳтиёжлар учун ажратилган маблағларни бекорга сарфлаш” деб аташган.
Трампнинг миграция сиёсати
Трамп 21 январь куни чегарадаги барча ноқонуний ўтиш жойлари ёпилишини таъкидлади. У АҚШ жанубий чегараси орқали ноқонуний мигрантларнинг киришини тақиқлаш тўғрисидаги фармонни имзолади. Бошпана излаш баҳонаси билан у ерда қолиш ҳуқуқини чеклади.
Президент Ички хавфсизлик вазирлиги, Адлия вазирлиги ва Давлат департаментига АҚШга жанубдан ноқонуний кираётганларни чиқариб юбориш чораларини кўришни топширди. Пентагон чегарага қўшимча 1,5 минг аскар ва вертолётлар юборилишини эълон қилди. Шунингдек, 5 мингдан ортиқ ноқонуний мигрантларни депортация қилиш учун авиация тақдим этилади, уларнинг оқими ва ноқонуний савдосини тўхтатиш учун вақтинчалик ва доимий тўсиқлар қурилади.
Мексика президенти АҚШга бориш учун унинг мамлакатига келаётган ноқонуний мигрантлар ўз ватанларига қайтариб юборилишини айтди. Мексика АҚШдан ноқонуний мигрантларни олиб келаётган ҳарбий транспорт самолётини қабул қилишдан бош тортди.
АҚШ президенти Дональд Трамп мамлакатдан кетадиган ноқонуний муҳожирларга 1000 доллардан ташқари бепул авиачипта берилишини айтди.
Изоҳ (0)