Pokistonning shimoli-g‘arbida politsiya mashinasida yuz bergan kuchli portlash oqibatida ikki nafar xodim vafot etdi. Bu haqda APNews jurnalistlari xabar berdi.
Voqea Xayber-Paxtunxva viloyatining Janubiy Vaziriston okrugidagi Vana shahrida yuz bergan. Mahalliy politsiya boshlig‘i Adam Xonning aytishicha, hujum natijasida kamida ikki nafar huquq-tartibot xodimi halok bo‘lgan, yana 14 kishi jarohat oldi. Jabrlanganlarning aksariyati oddiy aholi vakillari.
Ma’lumotlarga ko‘ra, so‘nggi haftalarda mamlakat shimoli-g‘arbida jangarilar tomonidan zo‘ravonlik holatlari ko‘paygan, natijada o‘nlab xavfsizlik kuchlari vakillari o‘ldirilgan.
Shuningdek, Pokiston hukumati Bajur tumanida harbiy operatsiyaga tayyorgarlik ko‘rmoqda. U yerda oqsoqollar jangari harakatlardan qochish uchun hukumat va isyonchilar o‘rtasida kelishuv yo‘llarini izlamoqda. Bunday operatsiyalar ilgari ham tinch aholining ommaviy ko‘chirilishiga sabab bo‘lgan.
Terakt uchun javobgarlikni hozircha hech kim o‘z zimmasiga olmagan. Biroq, rasmiylar fikricha, gumonlar birinchi navbatda harbiylar va tinch aholiga tez-tez hujumlar uyushtirishi bilan tanilgan “Tehrik-e-Tolibon Pokiston” (TTP) harakatiga tushishi mumkin. Bu harakat terrorchilik tashkilotlari ro‘yxatiga kiritilgan.
Nashrning ta’kidlashicha, TTP 2021-yil avgustida AQSH va NATO qo‘shinlari chiqib ketganidan so‘ng Afg‘onistonda hokimiyatga qaytgan afg‘on toliblari bilan chambarchas bog‘liq. Shundan keyin ko‘plab TTP jangarilari Afg‘oniston hududidan boshpana topdi va, rasmiylar aytishicha, u yerda o‘zlarini erkin his qilmoqda. Bu esa ularning Pokiston ichkarisidagi faolligini oshirgan.
Iyun oyi oxirida Pokistonning shimoli-g‘arbida terrorchi tomonidan amalga oshirilgan portlash natijasida kamida 16 kishi hayotdan ko‘z yumgandi.
AFP ma’lumotlariga ko‘ra, 2025-yil boshidan buyon Pokistonning Afg‘oniston bilan chegaradosh hududlarida hukumatga qarshi kurashni maqsad qilgan guruhlarning hujumlari natijasida 290 ga yaqin kishi, asosan xavfsizlik kuchlari xodimlari halok bo‘lgan.
Izoh (0)