AQSH va Xitoy bir-birining tovarlari uchun o‘zaro bojlarni 90 kunga pasaytirishga kelishib oldi. Bu haqda Bloomberg agentligi xabar berdi.
Jenevada ikki davlatning qo‘shma bayonoti e’lon qilindi. AQSH va Xitoy savdo keskinligini yumshatish, iqtisodiyotdagi kelishmovchiliklarni hal qilish uchun qo‘shimcha vaqt belgilashga kelishdi.
Xitoy importining katta qismiga nisbatan qo‘llanadigan 145 foizlik AQSH bojlari, jumladan, fentanilga bog‘liq stavka ham 30 foizgacha pasaytiriladi. O‘z navbatida, Xitoyning Amerika tovarlariga nisbatan joriy etgan 125 foizlik bojxona to‘lovlari esa 10 foizgacha tushiriladi.
Ikki tomon iqtisodiy va savdo munosabatlarini muhokama qilishni davom ettirish uchun maxsus mexanizm yaratishga kelishib olgan. Bu muzokaralarga Xitoy bosh vaziri o‘rinbosari He Lifeng, AQSH moliya vaziri Skott Bessent va AQSH savdo vakili Jeymison Grir rahbarlik qiladi.
Muzokaralar navbatma-navbat Xitoyda, AQSHda yoki tomonlar kelishgan uchinchi mamlakatda o‘tkazilishi mumkin. Zarurat tug‘ilganda, tomonlar iqtisodiy va savdo masalalari bo‘yicha ishchi darajadagi maslahatlashuvlar o‘tkazishi kutilmoqda.
Trampning savdo urushi
2-aprel kuni AQSH prezidenti Donald Tramp barcha davlatlar uchun 10 foizlik asosiy tariflarni joriy qildi. Ammo bojlar har bir davlatning savdo balansiga qarab o‘zgardi. Xitoy bilan savdoda yirik defitsit mavjudligi bois AQSH bu mamlakat uchun tariflarni ancha yuqori darajaga ko‘tarib, 34 foizga yetkazdi.
Bunga javoban Pekin ham shuncha miqdorda Amerika tovarlariga bojlar soldi. Shundan so‘ng Tramp agar Pekin javob choralaridan voz kechmasa, bojlarni 50 foizgacha oshirish bilan tahdid qildi. Shu sababli bojlar 104 foizga oshdi. Natijada Xitoy Amerika mahsulotlari uchun bojlarni 84 foizga oshirishini e’lon qildi. Mazkur e’lon ortidan Tramp Pekin uchun tariflar 125 foizga chiqishini aytdi, keyinchalik buni 145 foizga oshirdi.
Xitoy mazkur tariflarga javoban stavkani 125 foizga ko‘tardi. Xitoy AQSHni “o‘zaro bojlar”ni bekor qilishga va o‘zining noto‘g‘ri amaliyotini tuzatishga chaqirdi. XXR raisi Si Szinpin hech bir davlat “boj urushi”dan yutmasligini qayd etdi. Shundan so‘ng ikkala davlat savdo muzokaralarini boshlagandi.
Izoh (0)