Pentagon rahbari Pit Xegset rafiqasi Jennifer Xegsetni xorijlik hamkasblari bilan yopiq uchrashuvlariga olib borgan. Ularda maxfiy harbiy ma’lumotlar muhokama qilingan. Bu haqda The Wall Street Journal xabar berdi.
Jennifer Xegset Fox News telekanalining sobiq prodyuseri bo‘lib, 6-mart kuni Pentagonning maxfiy uchrashuvlaridan birida ishtirok etgan. Unda Pit Xegset va Buyuk Britaniya mudofaa vaziri Jon Xili o‘rtasida yuqori darajadagi muzokaralar o‘tkazilgan. Mazkur uchrashuv transatlantik ittifoq uchun muhim ahamiyatga ega edi. Boisi unda Yevropa xavfsizligiga daxldor davlat Ukraina masalasi ko‘tarilgan.
Pentagondagi uchrashuvda Buyuk Britaniya qurolli kuchlari shtab boshlig‘i admiral Toni Radakan ham qatnashgan. Ular Qo‘shma Shtatlarning Ukrainani razvedka ma’lumotlari bilan ta’minlashni to‘xtatish haqidagi qarorining sabablarini muhokama qilishgan.
Aslini olganda, mudofaa vaziri xorijiy hamkasblar bilan uchrashuvga rasmiy jihatdan istalgan kishini taklif qilish huquqiga ega. Biroq odatda bunday muzokaralarda qatnashuvchilar ro‘yxati qat’iy cheklanadi va faqat maxsus ruxsatga ega shaxslargina ishtirok etadi. Chunki bunday uchrashuvlarda ko‘pincha maxfiy ma’lumotlar muhokama qilinadi.
Bundan tashqari, aksar hollarda maxfiy uchrashuvlar o‘tkaziladigan joyda begona shaxslarning kirib kelishini nazorat qiladigan xavfsizlik xizmati xodimlari bo‘ladi.
WSJ nashrining o‘z manbalariga tayanib yozishicha, ba'zi yuqori martabali amaldorlarning turmush o‘rtoqlari maxfiy ma'lumotlarga kirish huquqiga ega bo‘lishi mumkin. Biroq Pentagon vakili Jennifer Xegsetning bunday imtiyozga ega yoki yo‘qligini aniqlashtirishdan bosh tortgan.
Avvalroq AQSH mudofaa vaziri Qo‘shma Shtatlarning Yamanga zarbalar haqida ma’lumotlarni Signal messenjeridagi maxfiy chatda muhokama qilgani, beparvolik ortidan mazkur guruhga The Atlantic jurnalisti ham qo‘shib yuborilgani ma’lum bo‘lgandi.
Izoh (0)