Donald Tramp kecha, 10-may kuni Jenevada bo‘lib o‘tgan AQSH va Xitoy o‘rtasidagi o‘zaro savdo bojlari bo‘yicha muzokaralarni izohlar ekan, uchrashuvda ko‘plab kelishuvlarga erishilganini ta’kidlab o‘tdi.
“Shveysariyada Xitoy bilan juda yaxshi uchrashuv bo‘ldi. Ko‘p masalalar muhokama qilindi, ko‘plab kelishuvlarga erishildi. Do‘stona, ammo konstruktiv tarzda to‘liq tiklanish bo‘ldi. Biz Xitoyni Qo‘shma Shtatlar biznesi uchun ochiq ko‘rishni istaymiz, bu har ikki davlat Xitoy va AQSH uchun foydali. Katta yutuqlarga erishildi!”, deb yozdi Tramp Truth Social ijtimoiy tarmoqda.
10-may, shanba kuni Jenevada bo‘lib o‘tgan muzokaralarda AQSH moliya vaziri Skott Bessent va savdo vakili Jeymison Greyer, Xitoy tomonidan esa bosh vazir o‘rinbosari Xe Lifeng ishtirok etgan.
Xitoy tomoni uchrashuvda erishilgan natijalar haqida hozircha izoh bermadi. Uchrashuv arafasida AQSH ommaviy axborot vositalari Tramp muzokara kuni Xitoyga qarshi tariflarni 50 foizgacha tushirishi mumkinligini yozgan edi, biroq bu sodir bo‘lmadi. CNN manbasi muzokaralar yakshanba kuni davom etishini bildirgan.
Izoh (0)