“Tolibon” ayollarning jamoaviy namoz o‘qish uchun masjidga kirishini taqiqladi. Bu haqda Hirotdagi mahalliy manbalarga tayanib, Etilaatroz xabar berdi.
Ushbu manbalarga ko‘ra, cheklov masjid imomlari orqali jamoatchilikka yetkazilgan. 7-martdan ayollarning masjidlarda taroveh va juma namozlarida ishtirok etishiga ruxsat berilmasligi ta’kidlangan. “Tolibon” tegishli taqiqni bir nechta masjidlarda og‘zaki e’lon qilgan. Hech bir ayolning jamoat namozlarini o‘qish uchun “masjidga borishga haqqi yo‘qligi” ma’lum qilingan.
Ilgari Hirot shahridagi ba’zi masjidlarda, ayniqsa, taroveh va juma namozlarida ayollar maxsus ayollar bo‘limlariga qatnar edilar. “Tolibon” hozircha bu qarorga rasman izoh bermagan.
“Tolibon” hokimiyat tepasiga kelgach, xotin-qizlarga nisbatan ko‘plab cheklovlar joriy etildi. Taqiqlar tufayli ayollar va qizlar ta’lim olish, ishlash, sport, sayohat qilish va dam olish huquqidan mahrum qilindi.
Afg‘onistonda ayollarga nisbatan joriy qilingan ayrim taqiqlar quyidagilar:
- afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- ayollarning istirohat bog‘iga tashrif buyurishi;
- oilalar va ayollarning bog‘lari yoki yashil hududlari bo‘lgan restoranlarga kirishi;
- ayollar ovozi eshitilgan reklamalarni efirga uzatish;
- ayollarning sotuvchilari bilan savdolashish;
- akusher va hamshiralikka o‘qish;
- ayol diktorlarga televizordagi yangiliklarni o‘qishni va ayol jurnalistlarga matbuot anjumanlariga borish;
- ayollarga bir-biri bilan gaplashish taqiqlangan.
Izoh (0)