“Толибон” аёлларнинг жамоавий намоз ўқиш учун масжидга киришини тақиқлади. Бу ҳақда Ҳиротдаги маҳаллий манбаларга таяниб, Etilaatroz хабар берди.
Ушбу манбаларга кўра, чеклов масжид имомлари орқали жамоатчиликка етказилган. 7 мартдан аёлларнинг масжидларда таровеҳ ва жума намозларида иштирок этишига рухсат берилмаслиги таъкидланган. “Толибон” тегишли тақиқни бир нечта масжидларда оғзаки эълон қилган. Ҳеч бир аёлнинг жамоат намозларини ўқиш учун “масжидга боришга ҳаққи йўқлиги” маълум қилинган.
Илгари Ҳирот шаҳридаги баъзи масжидларда, айниқса, таровеҳ ва жума намозларида аёллар махсус аёллар бўлимларига қатнар эдилар. “Толибон” ҳозирча бу қарорга расман изоҳ бермаган.
“Толибон” ҳокимият тепасига келгач, хотин-қизларга нисбатан кўплаб чекловлар жорий этилди. Тақиқлар туфайли аёллар ва қизлар таълим олиш, ишлаш, спорт, саёҳат қилиш ва дам олиш ҳуқуқидан маҳрум қилинди.
Афғонистонда аёлларга нисбатан жорий қилинган айрим тақиқлар қуйидагилар:
- афғонистонлик аёлларнинг БМТ идораларида ишлаши;
- эркакларга аёллар учун кийим тикиш;
- аёлларнинг эркак шифокорларга бориши;
- аёлларнинг шифохонага ёлғиз бориши;
- аёлларнинг истироҳат боғига ташриф буюриши;
- оилалар ва аёлларнинг боғлари ёки яшил ҳудудлари бўлган ресторанларга кириши;
- аёллар овози эшитилган рекламаларни эфирга узатиш;
- аёлларнинг сотувчилари билан савдолашиш;
- акушер ва ҳамшираликка ўқиш;
- аёл дикторларга телевизордаги янгиликларни ўқишни ва аёл журналистларга матбуот анжуманларига бориш;
- аёлларга бир-бири билан гаплашиш тақиқланган.
Изоҳ (0)