Afg‘oniston Tashqi ishlar vazirligi direktor o‘rinbosari Sher Abbos Stanikzay hukumatni afg‘on ayollari va qizlarining ta’lim olishiga qo‘yilgan taqiqlarni bekor qilishga chaqirdi. Bu haqda CBS xabar berdi.
Amaldor diniy maktabdagi marosimda to‘planganlarga ayollar va qizlarning ta’lim olishini taqiqlashga hech qanday sabab yo‘qligini aytdi. “Tolibon” yetakchisi qizlarga oltinchi sinfdan keyin ta’lim olishni taqiqlagan. O‘tgan yilning sentyabr oyida esa hukumat ayollar uchun tibbiy ta’lim va kurslarni ham to‘xtatgan.
Afg‘onistonda ayol va qizlar faqat ayol shifokorlar hamda tibbiyot xodimlarida davolanishi mumkin.
“Biz yana rahbariyatni ta’lim eshiklarini ochishga chaqiramiz. 40 million aholining 20 million nafarini barcha huquqlaridan mahrum etib, ularga nisbatan adolatsizlik qilmoqdamiz. Bu islom qonunlariga ko‘ra emas, balki bizning shaxsiy tanlovimiz yoki tabiatimiz natijasi”, dedi Stanikzay.
Bu uning ayollar va qizlar ta’lim olishga loyiqligini birinchi marta aytishi emas. U shunga o‘xshash fikrlarni 2022-yil sentyabrida, qizlar uchun maktablar yopilganidan bir yil o‘tib va universitetlarda o‘qish taqiqlanishidan bir necha oy oldin ham bildirgandi.
“Tolibon” hokimiyat tepasiga kelgach, xotin-qizlarga nisbatan ko‘plab cheklovlar joriy etildi. Taqiqlar tufayli ayollar va qizlar ta’lim olish, ishlash, sport, sayohat qilish va dam olish huquqidan mahrum qilindi.
Afg‘onistonda ayollarga nisbatan joriy qilingan ayrim taqiqlar quyidagilar:
- afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- ayollarning istirohat bog‘iga tashrif buyurishi,
- oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish,
- ayollarning sotuvchilari bilan savdolashish,
- akusher va hamshiralikka o‘qish,
- ayol diktorlarga televizordagi yangiliklarni o‘qishni va ayol jurnalistlarga matbuot anjumanlariga borish,
- ayollarga bir-biri bilan gaplashish taqiqlangan.
Kanada, Avstraliya, Germaniya va Niderlandiya ayollar diskriminatsiyasi tufayli Xalqaro sudga “Tolibon” ustidan da’vo arizasi bilan murojaat qilmoqchi.
Izoh (0)