Afg‘oniston Islom Amirligi Oliy ta’lim vazirligi afg‘onistonlik qizlarga erkak vasiy hamrohlik qilgan taqdirda Pokistonda oliy ta’lim olishga ruxsat berilishi mumkinligi haqidagi matbuotda paydo bo‘lgan xabarlarni rad etdi. Bu haqda Khaama Press axborot portali ma’lum qildi.
Vazirlik matbuot kotibi Hafiz Ziyaulloh Hoshimiy OAV vakillariga “Pokiston bilan afg‘on qizlariga stipendiyalar berish bo‘yicha shartli kelishuv haqidagi xabarlar yolg‘on va asossiz” ekanini aytdi.
Nashr ma’lumotlariga ko‘ra, u “vazirlik afg‘onistonlik qizlar uchun stipendiyalar bo‘yicha hech bir davlat, shu jumladan, Pokiston bilan ham hech qanday kelishuvga erishmaganini” qayd etgan.
Yaqinda ba’zi ommaviy axborot vositalari vazirlik Pokiston bilan afg‘onistonlik talaba qizlarga erkak vasiy hamrohligida o‘qishni davom ettirishlari uchun kelishuvga erishgani haqida xabar berdi. Biroq vazirlik bunday kelishuv mavjud emasligini tasdiqladi, deya ta’kidlaydi Khaama Press.
“Tolibon” hokimiyat tepasiga kelgach, xotin-qizlarga nisbatan ko‘plab cheklovlar joriy etildi. Taqiqlar tufayli ayollar va qizlar ta’lim olish, ishlash, sport, sayohat qilish va dam olish huquqidan mahrum qilindi.
Afg‘onistonda ayollarga nisbatan joriy qilingan ayrim taqiqlar quyidagilar:
- afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- ayollarning istirohat bog‘iga tashrif buyurishi,
- oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish,
- ayollarning sotuvchilari bilan savdolashish,
- akusher va hamshiralikka o‘qish,
- ayol diktorlarga televizordagi yangiliklarni o‘qishni va ayol jurnalistlarga matbuot anjumanlariga borish,
- ayollarga bir-biri bilan gaplashish taqiqlangan.
Izoh (0)