“Tolibon” ayol diktorlarga televizordagi yangiliklarni o‘qishni va ayol jurnalistlarga matbuot anjumanlariga borishni taqiqladi. Bu haqda Solhnews xabar berdi.
Solhnews xabariga ko‘ra, buyruq Fazilatni targ‘ib qilish va illatlarning oldini olish boshqarmasi tomonidan berilgan. Teleekranlarda ayollarning paydo bo‘lishi va ularning ovozlari “erkaklar uchun provokatsiya” ekani ta’kidlangan. Hirot boshqarmasi ommaviy axborot vositalarini bu qoidani buzmaslikka chaqirgan. “Tolibon” rasmiy ravishda tegishli buyruqqa izoh bermagan. Bunday taqiq Qandahorda 2021-yilda ham “Tolibon” tomonidan kiritilgan.
“Tolibon” hokimiyat tepasiga kelgach, xotin-qizlarga nisbatan ko‘plab cheklovlar joriy etildi. Taqiqlar tufayli ayollar va qizlar ta’lim olish, ishlash, sport, sayohat qilish va dam olish huquqidan mahrum qilindi.
Afg‘onistonda ayollarga nisbatan joriy qilingan ayrim taqiqlar quyidagilar:
- afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- ayollarning istirohat bog‘iga tashrif buyurishi,
- oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish,
- ayollarning sotuvchilari bilan savdolashish,
- akusher va hamshiralikka o‘qish,
- ayollarga bir-biri bilan gaplashish taqiqlangan.
Kanada, Avstraliya, Germaniya va Niderlandiya ayollar diskriminatsiyasi tufayli Xalqaro sudga “Tolibon” ustidan da’vo arizasi bilan murojaat qilmoqchi.
Izoh (0)