Xalqaro jinoiy sud (XJS) prokurori Karim Xon “Tolibon” harakati rahbarlarini hibsga olish uchun order so‘radi, deb xabar bermoqda CNN.
“Tolibon” oliy rahbari Haybatulla Oxundzoda va Afg‘oniston Islom Amirligi bosh sudyasi Abdul Hakim Haqqoniyni insoniyatga qarshi jinsiy ta’qib bilan bog‘liq jinoyatlari uchun jinoiy javobgarlikka tortishga ishonchli asoslar bor”, deyiladi prokuratura bayonotida.
Xonning ta’kidlashicha, “Tolibon”ga muxolifat shaxslar “qotillik, qamoqqa olish, qiynoqqa solish, zo‘rlash va jinsiy zo‘ravonlikning boshqa shakllari hamda boshqa g‘ayriinsoniy xatti-harakatlar kabi jinoyatlarni sodir etish orqali shafqatsiz ravishda bostirilmoqda.
XJS prokurori tomonidan so‘ralgan qamoqqa olish orderlari sudya tomonidan tasdiqlanishi kerak. Prokuror yaqin vaqt ichida harakatning boshqa yuqori martabali a’zolari uchun yangi orderlar so‘rashini qo‘shimcha qildi.
“Tolibon” harakati 2021-yilda AQSH boshchiligidagi xalqaro koalitsiya qo‘shinlari Afg‘onistondan olib chiqib ketilgandan so‘ng mamlakatda hokimiyat tepasiga keldi. Shundan so‘ng mamlakatdagi xotin-qizlarga nisbatan ko‘plab cheklovlar joriy etildi. Taqiqlar tufayli ayollar va qizlar ta’lim olish, ishlash, sport, sayohat qilish va dam olish huquqidan mahrum qilindi.
“Bu bizning ovozlarimiz unutilmaganiga, dunyo hamon tenglik va adolat uchun chaqiriqlarimizni eshitayotganiga umid bag‘ishlaydi”, deydi Afg‘onistonda qizlar uchun uyma-uy savodxonlik darslari o‘tkazayotgan afg‘on ayol CNN’ga.
U jazo choralaridan xavfsirab, o‘z ismini oshkor qilmaslikni so‘radi.
Afg‘onistonda ayollarga nisbatan joriy qilingan ayrim taqiqlar quyidagilar:
- afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- ayollarning istirohat bog‘iga tashrif buyurishi,
- oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish,
- ayollarning sotuvchilari bilan savdolashish,
- akusher va hamshiralikka o‘qish,
- ayol diktorlarga televizordagi yangiliklarni o‘qishni va ayol jurnalistlarga matbuot anjumanlariga borish,
- ayollarga bir-biri bilan gaplashish taqiqlangan.
Izoh (0)