Kanada, Avstraliya, Germaniya va Niderlandiya ayollar diskriminatsiyasi tufayli Xalqaro sudga “Tolibon” ustidan da’vo arizasi bilan murojaat qilmoqchi. Bu haqda The Guardian xabar berdi.
Da’vo tarafdorlari, agar “Tolibon” Xalqaro sud yurisdiksiyasini tan olmasa ham, sud qarori Afg‘onistonning yangi hukumati bilan diplomatik aloqalar o‘rnatmoqchi bo‘lgan boshqa davlatlar uchun to‘xtatuvchi omil bo‘lishi mumkinligiga ishonchi komil. BMTga a’zo davlatlar Xalqaro jinoiy sud qarorlariga rioya qilishi kerak.
Ta’kidlanishicha, jarayon boshlanishidan oldin Afg‘onistonga javob qaytarish uchun 6 oy vaqt beriladi. Sudga da’vo qilgan davlatlar “Tolibon” bilan diskriminatsiyaga chek qo‘yish uchun muzokaralarga ochiq.
“Ular vaziyatni diplomatik yo‘l bilan hal qilishga umid qilmoqda. Biroq muzokaralar natija bermasa, ish sudda davom etadi”, deyiladi xabarda.
Gender tengsizligi bilan bog‘liq davlatlararo nizo birinchi marta Gaagadagi Xalqaro sudning kun tartibiga kiritiladi. Ish Bosh assambleya tomonidan 1979-yilda qabul qilingan va 1981-yilda kuchga kirgan Ayollarga nisbatan diskriminatsiyaning barcha shakllariga barham berish to‘g‘risidagi konvensiya doirasida ko‘rib chiqiladi.
Afg‘onistonda ayollarga nisbatan joriy qilingan ayrim taqiqlar quyidagilar:
- afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- ayollarning istirohat bog‘iga tashrif buyurishi,
- oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish.
- ayollarning sotuvchilari bilan savdolashishi taqiqlangan.
Izoh (0)