Kobulda xorijiy ommaviy axborot vositalariga ma’lumot va dasturlarni “ruxsatsiz uzatgani” uchun ayollarning Radio Begum radiostansiyasi faoliyati to‘xtatildi. Bu haqda CNN xabar berdi.
“Tolibon” Axborot va madaniyat vazirligi vakillari radiostansiyasi binosini tintuv qilgan. Tintuv chog‘ida xodimlarning, jumladan, jurnalist ayollarning kompyuterlari, qattiq disklari, fayllari, telefonlari musodara qilingan. Stansiyada ishlaydigan, ammo rahbarlik lavozimlarini egallamagan ikki erkak ham qo‘lga olingan.
Keyinroq vazirlik “efirga uzatish siyosati va litsenziyadan noto‘g‘ri foydalanish” tufayli radiostansiya faoliyati to‘xtatilganini tasdiqlagan. Da’volar orasida “xorijiy telekanalga kontent va dasturlarni ruxsatsiz taqdim etish” ko‘rsatilgan. Xabarda qaysi telekanal haqida gap ketayotgani aniqlanmagan, biroq radiostansiya kelajagi “o‘z vaqtida” belgilanishi aytilgan.
Radiostansiya faoliyatini to‘xtatish to‘g‘risidagi qaror inson huquqlari tashkilotlari, jumladan, “Chegara bilmas muxbirlar” (RSF) tomonidan qoralangan. Ular taqiqni darhol bekor qilishga chaqirgan.
Radio Begum faoliyati to‘xtatilishidan oldin kuniga olti soatlik ta’lim dasturlarini, shuningdek, butun Afg‘oniston bo‘ylab ayollarga mo‘ljallangan salomatlik, psixologiya va ma’naviyatga oid kontentni efirga uzatgan. Stansiya rahbariyati ta’kidlashicha, ularning maqsadi siyosiy faoliyat bilan shug‘ullanmasdan qizlarga ta’lim berish va ayollarni qo‘llab-quvvatlashdan iborat edi.
“Tolibon” hokimiyat tepasiga kelgach, xotin-qizlarga nisbatan ko‘plab cheklovlar joriy etildi. Taqiqlar tufayli ayollar va qizlar ta’lim olish, ishlash, sport, sayohat qilish va dam olish huquqidan mahrum qilindi.
Afg‘onistonda ayollarga nisbatan joriy qilingan ayrim taqiqlar quyidagilar:
- afg‘onistonlik ayollarning BMT idoralarida ishlashi;
- erkaklarga ayollar uchun kiyim tikish;
- ayollarning erkak shifokorlarga borishi;
- ayollarning shifoxonaga yolg‘iz borishi;
- ayollarning istirohat bog‘iga tashrif buyurishi,
- oilalar va ayollarning bog‘lari yoki yashil hududlari bo‘lgan restoranlarga kirishi,
- ayollar ovozi eshitilgan reklamalarni efirga uzatish,
- ayollarning sotuvchilari bilan savdolashish,
- akusher va hamshiralikka o‘qish,
- ayol diktorlarga televizordagi yangiliklarni o‘qishni va ayol jurnalistlarga matbuot anjumanlariga borish,
- ayollarga bir-biri bilan gaplashish taqiqlangan.
Izoh (0)