Gollivud yulduzlari sahna va ekranlarda o‘z mahoratini ko‘rsatibgina qolmay, real hayotda saxovat va mehr-oqibat namunasi bo‘la olishadi. Quyida og‘ir hayotiy sinovlarga duch kelgan insonlarga yordam qo‘lini cho‘zgan va boshqa insoniylik fazilatlari bilan yanada ko‘proq ehtirom qozongan aktyorlar hikoyalarini keltiramiz.
Pol Uoker juftlikka olmos uzuk sovg‘a qilgan
2004-yilda Kayl Apxem va uning o‘sha paytdagi qallig‘i, hozirgi rafiqasi Kristen bilan zargarlik do‘konlaridan birida brilliant ko‘zli uzuk qidirayotgan edi. Ulardan tashqari, do‘konda yana bir xaridor bor edi, lekin juftlik unga e’tibor qaratmadi.
Erkak Kayl va Kristenga qimmatroq buyumlarni ko‘rishni maslahat berdi, ammo juftlik bunga puli yetmasligini tan oldi. Suhbatdan so‘ng ular nihoyat Pol Uokerni tanidi. Kayl aktyorga armiyada xizmat qilgani va yaqinda ikkinchi marta Iroqqa ketishi haqida aytib berdi. Safardan oldin Kayl bo‘lajak turmush o‘rtog‘iga uzuk sovg‘a qilishni istagan edi.
Kristenning eslashicha, Kaylning askarligini eshitgan Polning yuzi o‘zgardi. O‘sha kuni juftlik hech narsani tushunmay, do‘konni tark etdi. Yoshlar hech narsa sotib olmadi — olmos ko‘zli uzuklardan biri qizga yoqqan bo‘lsa-da, bunday taqinchoq juftlikka qimmatlik qildi.
Ammo tez orada ular kutmagan ish bo‘ldi: do‘kon xodimi qo‘ng‘iroq qilib, ulardan 9 ming dollarlik uzukni olib ketishni so‘radi. Uzuk pulini noma’lum kishi to‘lagan edi. Yoshlar buni bilishga harakat qildi, ammo do‘kon xodimlari bu odam kim ekanligini oshkor etmadi.
Haqiqat 2013-yilda yuzaga chiqdi. Brayan O’Konnor rolini o‘ynagan “Forsaj” filmlari yulduzi jangovar filmning yettinchi qismini suratga olish vaqtida avtohalokatda vafot etadi. Shundan keyingina do‘kon maslahatchilaridan biri ushbu voqeani jurnalistlarga aytib beradi va anonim odam aslida Uoker ekanligi tasdiqlanadi.
Kianu Rivz xayriya tashkilotlarini anonim tarzda boshqaradi
Kianu Rivz o‘zining saxiyligi va xayriya ishlari bilan tanilgan. U bolalar shifoxonalariga muntazam ravishda mablag‘ ajratib, hatto o‘z xayriya jamg‘armasini tashkil etgan. Biroq u bu faoliyatini anonim tarzda olib boradi, shuning uchun jamg‘armaning nomi va qaysi shifoxonalarga yordam berayotgani haqida ma’lumotlar ommaga oshkor qilinmagan.
Tom Kruz mashina urib yuborgan qizni kasalxonaga olib borgan va davolanish xarajatlarini to‘lagan
Filmlarda Tom Kruz ko‘pincha dovyurak va jasur qahramonlarni ijro etadi va bu jihatlar haqiqiy hayotdagi Tom uchun ham xosdir. 1996-yilda aktyor Santa Monikada 23 yashar qizni mashina urib ketganiga guvoh bo‘lgan. Tez yordamga qo‘ng‘iroq qilgan Kruz tibbiyot xodimlari yetib kelgunicha qizning oldidan jilmagan. Jabrlanuvchining tibbiy sug‘urtasi yo‘qligini bilganidan keyin esa o‘z hisobidan 7000 dollar to‘lagan. Qiz bu vaqtda Tomni tanimagan va o‘ziga kelgachgina, Gollivud yulduzi unga yordam berganini bilgan.
Bu hali hammasi emas. Oradan yillar o‘tib yana Tom Kruz yana bir necha marta jonbozlik ko‘rsatgan. Qo‘shni ayol mashinadan tushganida zo‘ravonlar uni o‘rab olib, 153 ming dollarlik taqinchoqlarini yulib, olib ketmoqchi bo‘lgan. Shu vaqt Tom qo‘riqchilari bilan birga paydo bo‘lgan va jinoyatchilarni haydab yuborgan.
Xarrison Ford skaut bolani qutqargan
“Yulduzlar jangi” filmida Xarrison Ford uchuvchi Xan Solo rolini o‘ynagan. Ma’lum bo‘lishicha, aktyor real hayotda ham uchuvchilik mahoratiga ega. U tajribali vertolyot boshqaruvchisi bo‘lib, bo‘sh vaqtida bedarak yo‘qolganlarni izlab topish va ularni qutqarish bilan shug‘ullanadi. 2001-yilda Ford Yutadagi skaut bolalardan biri yo‘qolib qolganini eshitgach, yordamga keladi.
Skaut bolalar — bu 11-18 yosh oralig‘idagi o‘smir yigitlardan iborat xalqaro yoshlar harakati a’zolari. Ular tabiat qo‘ynida yashash, o‘ziga va boshqalarga yordam bera olish, jamoada ishlash, yetakchilik kabi ko‘nikmalarni o‘rganishadi.
13 yoshli bola o‘z guruhidan ajralib qolib, butun yomg‘irli tunni Yelloustoun milliy bog‘i yaqinida o‘tkazgan. Xarrison hech ikkilanmasdan o‘z vertolyotida havoga ko‘tarilgan va bir necha soatdan so‘ng bolani lageridan 16 kilometr uzoqlikdan topgan.
2000-yilda Xarrison Ford Idaxo tog‘larida yo‘qolgan sayyoh Sara Jorjni o‘zining vertolyoti bilan qidirib topib, qutqarib qolgan. Shuningdek, 2017-yilda Kaliforniyada avtohalokatga uchragan yosh ayolga yordam berib, uni xavfsiz joyga olib chiqishda yordam bergan.
Alan Rikman restorandagi to‘lovlarini doim o‘zi to‘lagan va begona bolalarga “Garri Potter” filmini suratga olish ishlarini ko‘rsatgan
Severus Sneyp rolini o‘ynagan Alan Rikman shunday odam edik, do‘stlari va yaqin insonlar uchun restoran to‘lovlarini doim o‘zi amalga oshirar edi. Agar boshqa birov to‘lash uchun o‘rnidan tursa ham, Alan mo‘jizaviy epchillik bilan birinchi bo‘lib ofitsiantga kartasini uzatar edi.
Boshqa aktyorlarning so‘zlariga ko‘ra, Alan “Garri Potter” asarini sevib o‘qigan ko‘plab notanish bolalarni olib kelib, ularni sahna ortida bo‘layotgan ishlarni ko‘rsatgan. O‘sha bolalardan biri Jey 15 yoshda edi. U umrining so‘nggi haftalarini “Garri Potter”da o‘ynashni orzu qilib o‘tkazayotgan edi. Prodyuser Paula Dyupre Jeyning istagini eshitgach, unga hech qanday yordam bera olmasligini aytgan, lekin Rikman aralashib, bolaning qo‘lidan ushlab, uni Remus Lyupin olib borayotgan dars sahnasidagi bolalar orasiga qo‘shib qo‘ygan. Ammo marhum Jey filmdagi bu kadrdan joy olmagan.
Robin Uilyams uysizlarga yordam bergan
Biror film suratga olishdan avval shartnoma tuzilganda aktyorlar nafaqat gonorar miqdoriga, balki suratga olish maydon sharoitlari, yashash tarzi, parvoz chiqimlari va shaxsiy ehtiyojlariga ham alohida e’tibor berishadi. Ammo aktyor Robin Uilyams rejissyorlarga ajoyib shart qo‘yar edi: agar studiya u bilan ishlashni istasa, har bir filmni suratga olish paytida suratga olish joyi yoki ko‘chadagi uysiz odamlarni yollashga majbur bo‘lishgan.
Uysizlar oddiy vazifalarni bajarishar: asbob-uskunalarni ushlab turar yoki kichik epizodlarda chiqishlari kerak bo‘lgan. Eng asosiysi, ularga vaqtincha boshpana va kundalik maosh berib turilgan va uysizlar o‘zini tiklab olishlari uchun imkoniyat berilgan. Karyerasining oxiriga kelib Robin 1500 dan ortiq boshpanasizlarga shu tariqa yordam bergan.
Jon Sina o‘lim yoqasidagi bolalarning 600 dan ortiq orzu va tilaklarini bajargan
1980-yilda Arizona shtatining Feniks shahrida yashashga oz vaqtlari qolgan bolalar uchun maxsus jamg‘arma tashkil etildi. Amerikalik aktyor Jon Sina “Make A Wish” jamg‘armasi orqali 650 dan ortiq bolalarning orzu va tilaklarini amalga oshirib, yangi rekord o‘rnatgan. Mazkur jamg‘arma og‘ir kasallikka chalingan 2,5 yoshdan 18 yoshgacha bo‘lgan bolalarning tilaklarini bajarishga yordam beradi.
U 2002-yilda ilk bor ushbu jamg‘arma bilan hamkorlikni boshlagan va o‘shandan beri ko‘plab yosh bolalarning orzularini ro‘yobga chiqargan. Jon Sina ushbu faoliyati davomida bolalar va ularning oilalariga quvonch ulashib, ko‘plab yosh qalblarga umid baxsh etgan.
Kolin Farrell bir odamning hayotini o‘zgartirib yuborgan
Toronto ko‘chalarida kezib yurgan Kolin Farrell tasodifan o‘zi tanimagan uysiz odam bilan suhbat qurib, bir necha daqiqadan so‘ng uni kiyim-kechak do‘koniga borishga taklif qilgan. U yerda erkak xohlagan narsasini olishni buyurgan. Umumiyi hisob ikki ming dollardan oshib ketgan. So‘ng Kolinning yangi tanishi vaqtincha biror joyda xonani ijaraga yashab turishi uchun yana 830 dollar bergan. Aktyor keyingi yillarda ham u bilan aloqada bo‘lishda davom ettirdi. Bir paytlar boshpanasiz qolgan yigit Farrel tufayli yangi hayot boshladi.
Izoh (0)