Los Anjelesdagi yong‘in boy-u kambag‘alni birlashtirdi: Sheron Stoun yuk mashinalarida oziq-ovqat tarqatdi, Jeymi Li Kertis 1 million dollar xayriya qildi (foto)

Los Anjelesda 7-yanvarda boshlangan yong‘inlar davom etmoqda. So‘nggi ma’lumotlarga ko‘ra, halok bo‘lganlar soni 25 taga yetdi, yuzlab uylar zarar ko‘rdi va 100 mingdan ortiq aholi evakuatsiya qilindi.

Yong‘in mashhur Gollivud yozuvi joylashgan tepaliklarga ham yetib borgan. Hozirgi paytda faqat uchta katta yong‘in — Vudli, Olivas va Sanset kabi hududlarda yong‘inlar o‘chirilgan. Biroq yana beshta katta hudud — Peliseyds, Iton, Herst, Lidiya va Kennet kabi joylarda tabiiy ofat tarqalishi davom etmoqda.

Umumiy yetkazilgan zarar miqdori hozircha hisoblanmagan, lekin natijalar juda katta raqam bo‘lishi kutilmoqda. Kaliforniyadagi uylar seysmik xavf tufayli asosan yog‘ochdan qurilgan. Shu va kuchli shamol sababli yong‘inni to‘liq o‘chirishning iloji bo‘lmagan.

Ko‘pchilik bunday ofatdan ko‘rilgan katta talafotda Los Anjeles meri Karen Bassni ayblamoqda. Aynan u yong‘in va o‘t o‘chirish xizmatlari xarajatlarini qisqartirgan, shuningdek, yong‘in boshlangan kunning o‘zidayoq shaharni tark etgan. Shu sababli ijtimoiy tarmoqlarda uni o‘z lavozimidan ketishga chaqirganlar ham bo‘ldi.

Kaliforniya aholisi yong‘inning halokatli oqibatlari bilan kurashish uchun mustaqil harakat qilishiga to‘g‘ri kelmoqda: qo‘shni uylarni o‘chirishda yordam bermoqda, boshpanasidan mahrum bo‘lganlarni o‘z uylarida kutib olishga tayyor ekanliklarini aytishmoqda. So‘nggi besh kun ichida yong‘in taxminan 10 mingta binoni yo‘q qilgan. Los Anjeles va atrofdagi shaharlarda joylashgan mehmonxonalarda joy qolmagan, ko‘pchilikning esa ularga to‘lashga sharoiti yo‘q.

Megan Markl va shahzoda Garri o‘z do‘stlarini Montesito shahridagi uylarida kutib olishgan. Hozirda er-xotin Pasadenada birga bo‘lib, ehtiyojmandlarga ovqat va kiyim tarqatishda yordam bermoqda. Shuningdek, ular yong‘indan zarar ko‘rganlarga yordam yig‘ish uchun xayriya fondi tashkil qilgan.

Yong‘inlardan zarar ko‘rganlarga yordam bergan mashhurlar orasida Anjelina Joli ham bor. U o‘g‘li Noks bilan birga ehtiyojmandlar uchun oziq-ovqat tarqata boshladi. Shuningdek, u Los Felisda uyida bir nechta insonlarga yashash uchun joy ajratdi.

Shuningdek, Jeymi Li Kertis xayriya fondlariga 1 million dollar miqdorda pul yubordi, Sheron Stoun esa kiyim-kechak va oziq-ovqat bilan bir nechta yuk mashinasini aholiga yetkazib berdi. Ushbu tashabbusga opa-singil Kardashyanlar ham qo‘shildi.

Allaqachon uylarini yo‘qotgan mashhurlar orasida Anna Faris, Adam Brodi, Leyton Mister, Spenser Pratt va Heydi Montag, Jeyms Vuds, Yevgeniy Levi, Mayls va Kelli Teller, Jon Gudman va boshqalar bor. Jumladan, Entoni Hopkinsning 6 million dollarlik uyi ham yonib ketdi.

Tinch okeani Peliseyds hududidagi mashhurlarning uylari ham yong‘in ostida qolgan. U yerda Adam Sandler, Ben Afflek, Tom Henks va Stiven Spilberglar xonadoni bor edi.

Jeyms Vuds ham Los Anjelesdagi o‘zining hashamatli uyini yo‘qotdi. Mahalliy telekanallardan birida 77 yoshli aktyor ko‘z yoshlarini tiyolmay, shunday dedi:

“Bu xuddi do‘zaxga o‘xshar edi. Atrofimizdagi har bir uy yonib ketayotganini ko‘rish ayanchli edi”.

Mamlakat prezidenti Jo Bayden Kaliforniyada favqulodda holat e’lon qilgan, ko‘plab hududlarda evakuatsiya jarayonlari davom etmoqda.