Aktrisa Yulduz Rajabova “Temp FM” radiosiga bergan intervyusida “Mendirman Jaloliddin” serialidagi partnyori Emre Kiviljim bilan munosabatlari hamda ijodidagi yangiliklar haqida so‘zlab berdi.
Gollivud filmidagi ijrosi
— Amerikaliklar tomonidan suratga olingan “Tamerlan” deb nomlangan filmda suratga tushdim. Ushbu film buyuk bobokalonimiz Amir Temur haqida bo‘lib, u yerda turli davlatlardan aktyorlar rol ijro etishdi. Filmda biz ingliz tilida gaplashdik. Ingliz tilini yaxshi bilsam-da, filmga tayyorgarlik jarayonida yana o‘qib, ingliz tilimni yaxshiladim. Film 2025-yilda namoyish etilishi kutilmoqda, deydi aktrisa.
Emre Kiviljim bilan munosabatlari haqida
Yulduz Rajabova turk aktyori Emre Kiviljim bilan 2020-yilda “Mendirman Jaloliddin” serialini suratga olish jarayonlarida tanishgan edi. Emre serialda bosh qahramon — Jaloliddinni gavdalantirgan, Yulduz esa Jaloliddinning sevgilisi — Qutlibekani ijro etgandi. Serial taqdimotidan so‘ng turk va o‘zbek OAVlarida Emre va Yulduzning hayotda ham bir-biriga nisbatan iliq munosabatda ekanligi haqida xabarlar tarqaldi. Serialning Toshkentdagi taqdimotida Emre va Yulduzning naqadar yaqin munosabatda ekani oshkor bo‘ldi.
2021-yilda Emre Kiviljim Instagram sahifasiga Yulduz Rajabova bilan tushgan suratini joylab, uni tug‘ilgan kuni bilan tabrikladi hamda “Tug‘ilgan kuning bilan, sevgilim” deb yozib qoldirdi. Ushbu post izohiga o‘zbek shou-biznesi vakillari ikki yoshga baxt tilab, samimiy tilaklarni yozib qoldirishdi. Yulduz va Emre bir necha bor turli madaniy tadbirlarda birga ishtirok etdi, juftlik muxlislariga Dubay va Istanbul sayohatlarida ham birga ko‘rinish berdi.
Emre Kiviljim 2023-yilda jurnalist Jasur Hamroyevga bergan intervyusida “Yulduzga bo‘lgan sevgingiz tugadimi?” degan savolga “Ishq bitmas, u mozorga qadar”, deb javob bergan edi.
O‘tgan vaqt ichida Yulduz Rajabova turkiyalik hamkasbi bilan munosabatlariga hech qanday izoh bermagan. Radioga bergan yangi intervyusida esa aktrisa, aslida, Emre bilan faqat do‘stona munosabatda bo‘lgani, do‘stona quchoqlashishlarni OAV vakillari noto‘g‘ri talqin qilgani haqida gapirdi.
— Emre Kiviljim bilan hamkasb, do‘stona munosabatlarimizni OAV vakillari muhabbatga yo‘yishdi. Bizda jurnalistlar o‘zlari ishongan narsa haqida gapirishni yaxshi ko‘rishadi. Aslida, biz bir-birimizni loyiha bilan tabriklab quchoqlashganimiz va birga tushgan suratlarimizni turli OAV vakillari o‘z sahifalariga joylaganidan so‘ng, biz haqimizda turli gap-so‘zlar tarqaldi. Bularning barchasi haqiqatdan yiroq. Bugungi kunda yuragim bo‘m-bo‘sh, deydi Yulduz Rajabova.
Bir kishiga berilgan ikki imkon haqida
— Agar ayol kishi munosabatlarda o‘zini noqulay his etsa, bu munosabatlar uni xafa qilsa yoki u bu munosabatlarda o‘zligini yo‘qotib qo‘ysa, buni o‘zgartirib bo‘lmaydi va bunday munosabatlarni yakunlash lozim. Men bir insonga ikki marta munosabatlarni tiklash uchun imkoniyat berdim, biroq bu mening xatom edi. Bilasizmi, ayol kishi bir erkakka ishonsa, u unga qalbini va yuragini ochadi. Agar u inson ayol kishining ishonchini oqlamasa, bu uning qalbiga ozor beradi. Bunday tajribadan so‘ng siz o‘zingizga qaytasiz, sergak tortasiz, hamma narsaga real ko‘z bilan qaray boshlaysiz. Lekin hozir ham ba’zan yana bir marta imkon berishim kerakdir balki, degan fikrlar keladi, deydi aktrisa.
O‘zi suratga tushgan qaysi klipni yaxshi ko‘radi?
— “Ummon” guruhining kliplari va Ulug‘bek Rahmatullayevning “Omadim kelmadi” qo‘shig‘iga ishlangan klipni juda yaxshi ko‘raman. Ular kichik loyihalarim bo‘lsa-da, yorqin xotiralarga boy bo‘lgan. Ammo biror klipimni hayotimga daxldor deb ayta olmayman, deydi Yulduz Rajabova.
“Ota-onam alohida yashashadi”
— Ota-onam alohida yashashadi. Onam men va akam bilan Toshkentda, otam esa Navoiyda yashaydi. Otamni juda yaxshi ko‘raman, bo‘sh vaqtim bo‘ldi deguncha ularni ko‘rgani boraman. Ota-onam juda yaxshi munosabatlarda, shunchaki otam Navoiyda, onam esa biz bilan yashashni xohlashadi, deydi aktrisa.
Izoh (0)