Filmni suratga olish paytida turli jarohat olmaslikni hech kim kafolatlamaydi. Gollivud yulduzlari, ayniqsa, jangari filmlarda ishlay boshlaganda buni juda yaxshi anglaydi. Hatto ba’zilari dublyor va kaskadyorlardan foydalanishni rad etib, qat’iyatli va jur’atli shaxs ekanini isbotlaydi.
Leonardo Di Kaprio
Ko‘pchilik Kventin Tarantinoning “Ozod Jango” filmidagi ushbu sahnani eslasa kerak. Unda bosh qahramon g‘azab bilan mushtini stolga uradi va shisha siniqlari uning qo‘lini kesib yuboradi. Ammo bu lavha improvizatsiya ekanligini ko‘pchilik bilmaydi. Di Kaprio o‘sha vaqtda tasodifan jarohat olgan, ammo qon oqishiga qaramay o‘z rolini ijro etishda davom etgan.
Silvestr Stallone
Kaskadyorlar yordamisiz turli tryuklarni mustaqil bajarib kelgani bilan mashhur bo‘lgan Stallone ko‘p bor kasbi tufayli kasalxonaga tushib qolgan. “Chegarasiz” filmini suratga olish chog‘ida Stiv Ostin obrazi bilan bo‘lgan mushtlashuv sahnasida aktyorning yelkasi chiqib ketgan va bo‘yni singan. Stallone bir nechta operatsiyalarni boshidan o‘tkazdi. Ayna shu voqeadan so‘ng u hamkasblarini dublyor yordamidan bosh tortmaslikka chaqirdi.
Deniel Kreyg
Deniel Kreyg Jeyms Bond rolini qabul qilib olgandan so‘ng, ko‘plab tryuklarni bajarishga imzo chekkan. Bir epizodni suratga olishda Kreyg zarbadan qutula olmagan va ikkita tishini yo‘qotgan. Biroq regbi maktabida tahsil olgan aktyor bunday jarohatlardan qo‘rqmaydi:
“Otam sportchi bo‘lishimni orzu qilardi. Men regbini juda yaxshi o‘ynardim, deyarli professional darajada edim va keyinchalik futbol bilan shug‘ullandim. O‘sha yerda yelkamni jarohatlab oldim, bu hamon meni bezovta qilmoqda”, deydi aktyor.
So‘ng Kreyg uchun “Rahmdillik kvanti” loyihasi haqiqiy sinov bo‘ldi — suratga olish jarayonida uning mushaklari yorilib, bir nechta qovurg‘alari sindi, yuziga shu qadar ko‘p shikast yetdiki, unga sakkizta chok qo‘yildi.
Margaret Kuolli
“Oskar” ga nomzod bo‘lgan taniqli “Substansiya” filmida yosh aktrisa jiddiy muammolarga duch keldi. Har kuni bajarilishi kerak bo‘lgan murakkab grimm tufatli uning yuzida turli toshmalar va husnbuzarlar paydo qildi. Vaqt o‘tib Kuollining terisi shu qadar qizarib ketdiki, rejissyor oxirgi sahnalarda uni qorong‘u kadrda suratga olishga majbur bo‘ldi. Uning sog‘lig‘i tiklanishi uchun esa qariyb bir yil kerak bo‘ldi.
Chenning Tatum
“Tulkilar ovchisi” dramasini suratga olish chog‘ida Chenning Tatum o‘z obraziga shunchalik qiziqib qoldiki, sahnalarning birida u bor kuchi bilan boshini oynaga urdi. Tan jarohati olgan Tatum kasalxonaga yotqizilgan va ajoyib kadrlar filmga kiritilgan.
“To‘qqizinchi legion burguti” kartinasi ustida ishlayotganda qahramonlar muzdek daryoga sho‘ng‘ish sahnada aktyorlarning kostyumiga iliq suv quyishar edi. Ulardan biri tasodifan Tatumni qaynoq suv bilan kuydirib yuborgan.
Uma Turman
Kventin Tarantino va uning ilhom parisi Uma Turman o‘rtasidagi do‘stlik barchaga abadiydek tuyulgan edi, ammo 2010-yillarning o‘rtalarida aktrisa “Billni o‘ldirish” filmini suratga olish maydonchasida yuz bergan noxush hodisa haqida ochiq gapirib chiqqan. Ma’lum bo‘lishicha, kabrioletda olingan mashhur sahna davomida Turman jiddiy avtohalokatga uchragan — u soatiga 65 km tezlikda harakatlanayotib, boshqaruvni yo‘qotgan va daraxtga urilgan.
Mashina butunlay yaroqsiz holga kelgan, Turmanning o‘zi esa og‘ir tan jarohatlari, miya chayqalishi, bo‘yin va oyoq sinishi bilan shifoxonaga yotqizilgan. E’tiborli tomoni shundaki, avvaliga u ushbu sahnada suratga tushishni xohlamagan va kaskadyordan foydalanishni talab qilgan. Biroq Tarantino va film prodyuseri Harvi Vaynshteyn Turmanning o‘zi kadrda bo‘lishini talab qilgan. Kventin bundan juda afsusda edi, ammo aktrisa va rejissyor o‘rtasidagi munosabatlar yomonlashdi.
Tom Kruz
Mashhur Gollivud aktyori suratga olish maydonchasida bir necha marta o‘zini xavf ostiga qo‘ygan. “Uddalab bo‘lmas topshiriq” franshizasining oltinchi qismi ustida ishlayotganda Tom Kruz bir tomdan ikkinchi tomga sakrayotgan edi, biroq uzoqlikni noto‘g‘ri hisoblagan aktyor bino devoriga urilib, to‘pig‘ini sindirib olgan. Jarohatiga qaramay, Kruz o‘zining kaskadyorlik tryukini yakunladi, ammo ushbu baxtsiz hodisa studiyaga juda qimmatga tushdi. Suratga olish ishlari esa ikki oyga to‘xtatildi.
Nikol Kidman
Intervyularidan birida Nikol Kidman “Mulen Ruj”ning suratga olish jarayonida duch kelgan qiyinchiliklari, ikki marta qovurg‘asini sindirib olganini aytib bergan. Ma’lum bo‘lishicha, bunga aktyor Yuen Makgregor sababchi bo‘lgan.
“Yuen meni tushirib yuborgan va men qovurg‘amni sindirib olganman. Endi bitishni boshlaganida korset kiysam, qovurg‘a barqarorlashadi va yaxshiroq bo‘ladi. deb o‘ylaganman. Aksincha bo‘lib chiqqan: korset yanada zo‘riqtirib yuborgan. Men tik turgancha uni ikkinchi marta ham sindirib oldimov deb o‘ylaganimni yaxshi eslayman”, degan aktrisa.
Holli Berri
“Mushuk ayol” va “G‘aroyib odamlar” filmlari yulduzi Xolli Berriga ham o‘z kabiga sadoqati qimmatga tushgan. Turli filmlarda suratga tushish uchun aktrisa jang san’atlarini, jumladan, jiu-jitsu, tay boksi, kikboksing va taekvondoni o‘rgangan, shuningdek, o‘qotar qurollardan foydalanish bo‘yicha ham saboqlar olgan. Ammo shunchalik keng tayyorgarlik bilan ham u jarohatlardan qochib qutula olmagan. Berri “Zarbalar” filmida qo‘lini, dumg‘aza suyagini, ikki barmog‘ini va bir nechta qovurg‘asini sindirib olgan. Barcha jarohatlarga qaramay Holli film syomka jarayonlarini ortga surmagan va loyihani o‘z vaqtida yakunlagan.
Izoh (0)