Kaliforniyadagi o‘rmon yong‘inlari 12 mingdan ortiq oilani boshpanasiz qoldirdi. Aholining ko‘pgina qismi uylarini shu qadar tez tark etishga majbur bo‘ldiki, ular faqatgina kerakli hujjatlarini olishga ulgurib qoldi. Hozirda ushbu ofat qurbonlari uchun kiyim-kechak, poyabzal, shaxsiy gigiyena vositalari va boshqa zarur buyumlarni yig‘ish uchun maxsus markazlar tashkil etilgan. Aholiga yordam berishda ko‘plab Gollivud yulduzlari ham jonbozlik ko‘rsatmoqda.
Xususan, xonanda va aktrisa Jennifer Lopes Gollivuddagi ko‘p yillik faoliyati davomida to‘plagan garderobini yuk mashinasida gumanitar yordam sifatida yubordi. Kiyimlar Los Anjelesdagi maktab okrugi va Pasadena maktablari o‘quvchilari uchun mo‘ljallangan. Bundan tashqari, 55 yoshli xonanda JLO nomli shaxsiy kosmetika mahsulotlarini hamda turli aksessuarlarni ham xayriya qildi. Kerakli buyumlarning bari The A-List tashkilotiga yuborilgan.
Bundan tashqari, Jennifer Lopes tabiiy ofatlar paytida oilalar va ularning farzandlari uchun xavfsiz boshpana va birinchi yordam beruvchi Boys & Girls Club’ni ham moliyaviy qo‘llab-quvvatladi. Aktrisaning o‘zi bir vaqtlar bolaligida Bronksdagi boshpanalarda kun ko‘rgan:
“Ushbu yong‘in uyidan ayrilgan va qo‘rquv ostida qolgan bolalar uchun qanchalik travma bo‘lishini tasavvur ham qila olmayman. Bunday paytlarda Los Anjelesdagi Boys & Girls Club jamoasi yordamga muhtoj bolalar va oilalar uchun xavfsiz joy taqdim etishga tayyor turadi. Bu yerda bolalar o‘zlarini xavfsiz his qilishlari va hatto eng og‘ir damlarida ham kuch topa olishlari mumkin”, dedi Lopes.
-ab2l8r2j.jpeg)
Gollivudning yana bir mashhur aktyori Leonardo Di Kaprio ham katta miqdorda xayriya ishlarini amalga oshirdi. U davom etayotgan yong‘inlardan jabr ko‘rganlarga yordam berish uchun 1 million dollar xayriya qildi.
“Los Anjelesdagi o‘rmon yong‘inlari shahrimizni vayron qilmoqda. Men gumanitar yordam berish bo‘yicha hamkorlik dasturi orqali shoshilinch ehtiyojlar va yong‘inni bartaraf etish bo‘yicha saʼy-harakatlarni qo‘llab-quvvatlash uchun 1 million dollar ajrataman”, dedi Di Kaprio.
Bundan avval Los Anjelesdagi yong‘inlar boshlanganining ertasi kuni “Titanik” filmi yulduzi qallig‘i Vittoria Cheretti hamda ota-onasi bilan xususiy samolyotda Meksikaga yetib kelganida aeroportda paparatssiga tushib qolgan edi. Katta talafotlar fonida aktyorning AQSHni tark etishi ko‘plab xorijiy nashrlarda salbiy qabul qilingan edi.
Izoh (0)