Plyaj va dengiz ko‘pchilik uchun ideal dam olish joyi hisoblanadi. Ayniqsa, plyaj okean sohilida joylashgan bo‘lsa, bu ta’til yanada maroqliroq bo‘ladi. Okean qirg‘og‘idagi dam olishning dengizdagi dam olishdan farqini so‘z bilan ifodalash qiyin.
Hind okeani
Goa, Hindiston: Palolem sohili
Goa — Hindistondagi bu manzilga butun dunyodan yoshlar tashrif buyuradi. Palolem sohili jannatmakon bir go‘sha va ayni paytda eng mashhur sayyohlik yo‘nalishi hisoblanadi. Goaning muhiti dam olishga juda qulay. Bundan tashqari, narxlar jahon standartlariga ko‘ra ancha arzon.
Dam olish uchun eng qulay vaqt: oktyabrdan martgacha.
Maldiv orollari: Banyan Tri, Kakao oroli, Nika va Soneva plyajlari
Maldiv orollariga borgan sayyohlar Hind okeanidagi yuzga yaqin kimsasiz kichik orolchalarning birida hordiq chiqarish imkoniyatiga ega bo‘ladi. Bu joylar nafaqat ajoyib plyajlari bilan, balki okean suvlarida snorkling va g‘avvoslik qilish uchun g‘oyat qulay sharoitlari bilan ham mashhurdir.
Bu yerda hech qanday madaniy-tarixiy diqqatga sazovor joylar yo‘q, lekin bu joylar tinch yoki romantik dam olish uchun juda qulay. Shuni ta’kidlash joizki, Maldiv orollarida yarim yalang‘och yoki butunlay yalang‘och holda quyoshda toblanish qat’iyan man etilgan.
Dam olish uchun eng yaxshi vaqt: noyabrdan aprelgacha.
Mavrikiy: Flik en Flak, Tru o Bish va Paradi plyajlari
Mavrikiy sohillari marjon qoyalari va hashamatli mehmonxonalari bilan mashhur. Orolni har tomondan marjon riflari o‘rab turadi, shu bois plyaj yaqinidagi suv doimo tiniq va sokin bo‘lib, g‘avvoslik va yaxtalarda sayr qilish uchun ajoyib sharoit yaratadi.
Dam olish uchun eng yaxshi vaqt: aprel-may va sentyabrdan dekabrgacha.
Dayving uchun eng yaxshi vaqt: dekabrdan martgacha.
Syorfing uchun eng yaxshi vaqt: iyundan avgustgacha.
Seyshel orollari: Anse Volbert va Praslin plyajlari
Seyshel orollarining ajoyib qirg‘oqlari mayda toza qum bilan qoplangan, Hind okeanining sokin suvlari bilan yuvilib turadi, granit qoyalar va sershox taka-mak daraxtlari bilan o‘ralgan. Deyarli barcha mehmonxonalar oilaviy dam olishga mo‘ljallangan kichik xususiy pansionatlardir.
Vindsyorfing va yaxta uchish uchun eng yaxshi vaqt: maydan oktyabrgacha.
Dayving uchun eng yaxshi vaqt: martdan maygacha va sentyabrdan noyabrgacha.
Atlantika okeani
Algarve, Portugaliya: Ilha de Tavira, Albufeira va Lagos plyajlari
Portugaliyaning Atlantika qirg‘oqlari bir tomondan okean suvlari bilan yuvilsa, boshqa tomondan port shaharlar shovqini bilan o‘ralgan. Ba’zi joylarda nisbatan arzon mehmonxonalarni uchratish mumkin.
Dam olish uchun eng qulay vaqt: maydan oktyabrgacha.
Kanar orollari: La Gomera plyaji
Gomer oroli ko‘plab Kanar orollaridan, jumladan, mashhur Tenerifеdan farqlanadi. U go‘yo mukammal sokinlik baxsh etuvchi dam olish uchun yaratilgandek. Sayyohlar bu yerga faqatgina sivilizatsiyadan uzoqda, vulqonning qoramtir qumi yoyilgan okean sohilida hordiq chiqarish uchun kelishadi.
Dam olish uchun eng yaxshi vaqt: noyabrdan maygacha.
Syorferlar, ayniqsa, Guincho va Erikeira qirg‘oqlarini ma’qullashadi, bu yerda shamol va to‘lqinlar deyarli yil davomida faol dam olish uchun ajoyib sharoit yaratadi.
JAR: Atlantika okeani sohilidagi plyajlar
Janubiy Afrika Respublikasining butun Atlantika okeani qirg‘oqlari bo‘ylab har yili minglab sayyohlar hordiq chiqaradigan qumli plyajlar cho‘zilgan. Eng mashhur dam olish joylaridan biri Fransiyaning janubini esga soladigan Keyptaun plyajidir.
Dam oluvchilarni soyali palmalar o‘rab turadi, pikniklar uchun juda qulay bo‘lgan ko‘plab maysalar o‘sadi, qirg‘oq bo‘ylab esa turli-tuman restoran va barlar joylashgan. Bu yerdagi qum och tusda, suv moviy rangda, shabada esa toza va yoqimli.
Dam olishning eng yaxshi vaqti: oktyabrdan martgacha.
Tinch okeani
Fiji: Yasava plyaji
Yasava — Fiji tarkibiga kiruvchi kichik orollar zanjiridir. Marjon qumlarining ajoyib go‘zalligi tiniq moviy suv fonida yaqqol ko‘zga tashlanadi. Gollivud filmlari yoki reklama roliklariga ekzotik manzaralar kerak bo‘lganda, rejissyorlar ko‘pincha aynan shu joylarni tanlashadi.
Bu yerda dam olish ancha qimmatga tushadi, chunki Fijining asosiy oroli Nadidan samolyotda uchib borish yoki yaxtada suzib yetib borish talab etiladi. Aytishlaricha, Yasavada dam olishdan olingan taassurotlar kamida 8 oy davomida o‘z yangiligini yo‘qotmas ekan, chunki sochlardagi qumni yuvib tashlash uchun aynan shuncha vaqt kerak bo‘ladi.
Dam olish uchun eng qulay vaqt: maydan oktyabrgacha.
Bora Bora, Fransuz Polineziyasi: Matira plyaji
Bora Bora Tinch okeanidagi eng zo‘r va ayni paytda eng qimmat plyajlar joylashgan maskan hisoblanadi. Matira plyaji atrofidagi laguna marjon riflari bilan o‘ralgan, shu sababli ko‘rfazdagi suv doimo tinch va juda iliq bo‘ladi. Bora Borada dam olish faqat plyajda o‘tkaziladi - bu yerda hech qanday sayohatlar va diqqatga sazovor joylar yo‘q.
Dam olish uchun eng qulay vaqt: maydan oktyabrgacha, lekin yoz oxirida bu yerda odamlar juda ko‘payib ketadi.
Palau: The Rock Islands sohillari
Palau manzaralari suvdan bo‘y cho‘zgan ulkan xarsangtoshlar va marjon riflari bilan sayyohlarni lol qoldiradi. Bu yerdagi suv yil davomida yetarlicha iliq, suvosti olami esa o‘simlik va hayvonot dunyosining noyobligi bilan ajralib turadi. Ko‘plab g‘avvoslar uchun The Rock Islands’ga tashrif buyurish - har qanday narx evaziga ro‘yobga chiqarishga intiladigan yorqin orzudir. Haqiqiy meduzalar saltanatini Mecherchar orolining qoq markazida joylashgan Meduzalar ko‘lida kuzatish mumkin.
Dam olish uchun eng yaxshi vaqt: fevral-mart.
Izoh (0)