49 yoshli aktrisa Anjelina Joli onasi Marshelin Bertranning vafotidan keyin filmlarda rol o‘ynash unga qiyin kechayotgani haqida so‘zlab berdi.
W Magazine nashriga bergan intervyusida Joli onasi ikkisi doimo bir jamoadek yashagani, ishlagani, ammo 2007-yil boshida volidasini yo‘qotganidan so‘ng karyerasiga qiziqishi so‘ngani haqida aytdi. Marshelin Bertrand 56 yoshida og‘ir kasallikdan vafot etgan. 1999-yilda unga tuxumdon saratoni, bir necha yildan keyin esa ko‘krak saratoni tashxisi qo‘yilgan.
“Onam vafotidan keyin aktrisalik faoliyatimni davom ettirishim qiyinroq bo‘ldi, chunki karyeram u uchun qanchalik muhim ekanligini anglar edim” dedi Joli.
Anjelinaning so‘zlariga ko‘ra, u bolaligidan onasini baxtli ko‘rishni istagan, shu sababli Marshelin istagiga ko‘ra san’at sohasini tanlagan. Jolining kinoga kirib kelishi uning shaxsiy tanlovi bo‘lmagan:
“Men kinolarga chiqishni juda erta boshlaganman, chunki bu, avvalambor, onamning orzusi edi”, deydi intervyuda.
Aslida Marshelin xonim kino sohasida ishlashni istagan, u o‘smirligidan doimiy ravishda Chikago va Los Anjelesdagi tinglovlarga borgan, ammo 25 yoshida ikki farzandi bilan ajrashgan. Oqibatda butun e’tibori va hayotini farzandlariga baxsh etgan va orzusini oila uchun qurbon qilgan.
Foto: Reddit
“Onam erta turmushdan ajrashgach, uy bekasi bo‘lib qolishga qaror qildi. U mening aktrisa bo‘lishimni juda xohlardi. Ha, bu sohaga o‘z istagim bilan emas, balki onamni xursand qilish uchun kelib qolganman” dedi Joli.
1982-yilda 6 yoshli Joli otasi bilan birga o‘zining birinchi filmi — “Chiqish yo‘lini izlab”da rol o‘ynagan. Keyinroq Joli aktrisalik karyerasi ro‘zg‘or xarajatlarini yaxshi qoplashini tushungan va ishga sho‘ng‘ib ketgan:
“Men onamga kerakli barcha narsalarni sotib olgim, uy xarid qilgim kelardi. Va hammasi aynan shu lahzada boshlandi”, deb esladi aktrisa.
Foto: People
Onasining o‘limidan bir yil o‘tgach, Joli oilaparvarlik bo‘yicha o‘rnakni aynan volidasidan olish kerakligini anglab yetgan:
“Onam bu dunyoni tar etganidan keyingina men uni oilasi uchun eng sadoqatli va oliyjanob inson bo‘lganini angladim. Uning o‘limi menga hayotda aynan nimalar muhimligini yodga soldi”, dedi Anjelina.
Izoh (0)