Kaliforniya janubidagi keng ko‘lamli o‘rmon yong‘inlari sababli AQSH prezidenti Jo Bayden vakolat muddati tugashidan oldingi so‘nggi xorijiy safarini bekor qildi.
Oq uy matbuot kotibi Karin Jan-Pyerning xabar berishicha, Bayden Los-Anjelesdan qaytgach, u yerda politsiya, o‘t o‘chiruvchilar va qutqaruvchilar bilan uchrashgan, shundan so‘ng Italiyaga jo‘nashidan bir necha soat oldin safarga chiqishdan voz kechgan.
Bayden, shuningdek, yong‘inga qarshi federal chora-tadbirlarni boshqarishga e’tiborini qaratmoqchi ekanligini ta’kidlab, keyinroq qo‘shimcha ma’lumot berishini va’da qilgan.
Italiya va Vatikanga tashrif joriy yilning 9—12-yanvar kunlari bo‘lib o‘tishi mo‘ljallangan edi. Italiya bosh vaziri Jorja Meloni, prezident Serjio Mattarella va Rim papasi Fransisk bilan uchrashuvlar rejalashtirilgandi. AP agentligining ta’kidlashicha, ushbu safar ramziy ahamiyat kasb etishi va ikkinchi katolik prezidentining faoliyatini yakunlashi lozim.
Kaliforniya janubidagi yong‘inlar
Los-Anjeles atrofida kamida oltita yong‘in kuchaymoqda, jumladan, Tinch okeani sohilidagi Pasifik-Paliseyds hududida maydoni taxminan 64 kvadrat kilometrga yetgan eng yirik yong‘in o‘chog‘i ham mavjud. Yong‘inlardan biri AQSHning ikkinchi yirik shahri shimoli-g‘arbidagi Gollivudda avj olgan, olov mashhur Gollivud xiyoboniga bir necha yuz metr masofagacha yaqinlashgan.
Los-Anjeles atrofidagi o‘rmon yong‘inlari oqibatida kamida besh kishi halok bo‘lgani haqida okrug sherifi Robert Luna ma’lum qildi. Uning aytishicha, 130 mingdan ortiq kishiga evakuatsiya to‘g‘risida ko‘rsatma berilgan. Alanga 1500 tagacha binoni vayron qilgan. Poweroutage.us ma’lumotlariga ko‘ra, mintaqada 300 mingdan ortiq xonadon elektr energiyasiz qolmoqda.
Izoh (0)