“Kalmar o‘yini”ning ikkinchi mavsumida koreyalik xonandalar, reperlar, hatto K-pop aydollari ham rol o‘ynaganini bilarmidingiz?

“Kalmar o‘yini” ikkinchi mavsumining yanada ommalashishiga sabab faqatgina keskin sinovlar va qiziqarli syujet emasdi. Balki, serialga qo‘shilgan yangi aktyorlar tarkibi bo‘lib, ular orasidagi qo‘shiqchi, reper va aydollarning ba’zilari haqida ma’lumot beramiz.

Yan Tonken (Pak Yensik, 007 raqamli o‘yinchi)

Janubiy Koreyada YDG taxallusi bilan tanilgan. Aktyor, reper, xonanda, qo‘shiqlar muallifi, musiqiy prodyuser va hatto breyk-raqqos sifatida o‘zini sinab ko‘rgan.

Ikkinchi mavsumda Yensik qarzga botgan qimorboz rolini o‘ynaydi. O‘yinda u o‘g‘liga yordam berish uchun jon-jahdi bilan harakat qilayotgan onasi bilan uchrashib qoladi.

Musiqiy karyerasi

Yan Tonken — Janubiy Koreya taniqli hip-hop yulduzi. YDG 2001-yilda “Yangdonggeun AKA Madman” albomi bilan repda debyut qilgan. O‘shandan beri u yana bir nechta plastinka chiqargan: “Da Man On The Block!!” (2002), “Travel” (2003) va “Mirror” (28 Peak At Youth) (2006). Uning eng shov-shuvli xitlaridan biri “Bolo” deb nomlangan PENOMECO bilan hamkorlikdagi treki hisoblanadi.

Vi Xajun (Xvan Chun Xo)

Aktyor, model va qo‘shiqchi universitetni teatr va kino mutaxassisligi bo‘yicha tamomlagan. Bu uning ko‘ngilochar industriyadagi karyerasi asos bo‘ldi.
Xvan Chun Xo — Frontmen (tug‘ishgan akasi) bilan uchrashuvdan keyin birinchi mavsumda omon qolgan politsiya detektivi. Ikkinchisida esa Xvan Ki Xunga o‘yinga qaytishga yordam beradi, o‘zi esa yashirincha akasini topish va ehtimol uni to‘g‘ri yo‘lga qaytarishga harakat qiladi.

Musiqiy karyerasi

Yoshligida Vi Xajun qo‘shiqchi yoki boys-bend a’zosi bo‘lishni orzu qilgan. Maktabning o‘rta va yuqori sinflarida raqs mashg‘ulotlariga qatnagan. 2018-yilda u “Matrimonial Chaos” doramasiga “Maybe It’s Too Late” qo‘shig‘ini yozgan.

Vining raqs va musiqadagi tajribasi unga turli xil rollarni qiynalmay ijro etoladigan ko‘p qirrali artist bo‘lishga yordam berdi va uni Janubiy Koreyadagi eng mashhur yulduzlar safidan joy olishiga sabab bo‘ldi.

Li Benxon (Xvan Inxo, Frontmen)

Qahramonimiz 1970-yil 12-iyulda Seulda tug‘ilgan. 30 yillik faoliyati davomida u o‘zini model, aktyor va qo‘shiqchi sifatida sinab ko‘rdi.
Benxon 1991-yilda “Ona shahrim asfalti” doramasida ilk debyut rolini o‘ynagan. Keyinchalik aktyor “Xavfsiz hudud”, “Achchiq va shirin”, “Kobra hujumi” va “Men iblisni ko‘rdim” kabi koreys va Gollivud filmlaridagi rollari uchun xalqaro e’tirofga sazovor bo‘ldi.

Frontmen — serialning asosiy qahramoni. Ikkinchi mavsumda u 456-o‘yinchini aldashga qaror qiladi, o‘yin ishtirokchilaridan biriga aylanib, Ki Xunning ishonchini qozonadi. Uning roli mavsumga yangi intriga qo‘shgan.

Musiqiy karyerasi

1999-yilda Li Benxon “Lee Byung-hun — To Me” nomli albomini chiqargan. Bundan tashqari, u teleseriallar uchun saundtreklar yozadi.

Kan Hanel (Kan Deho, 388 raqamli o‘yinchi)

1990-yil 21-fevralda Pusan shahrida tug‘ilgan. Taniqli aktyor teatr, televideniye va kinodagi ijrolari bilan mashhur. Hanel musiqali teatrdagi ijodiy faoliyatini “Thrill Me” va “Assassins” spektakllarida chiqishlar bilan boshlagan. Kinoda ham Kan taniqli dramalarda rol o‘ynagan: “Vorislar” (2013), “Misen: Muvaffaqiyatsiz hayot” (2014) va “Oydin oshiqlar. Alvon yuraklar: Kore” (2016).

Kan Dexo — dengiz piyodalari korpusining sobiq a’zosi. Ikkinchi mavsumda u boshqa dengiz piyodasi — Ki Xunning eng yaqin do‘sti Chonbe bilan do‘stlashadi.

Musiqiy karyerasi

Kan Hanelning otasi xalq artisti bo‘lib, o‘g‘lini bolaligidanoq musiqa bilan tanishtirgan — yigit qo‘shiq aytish va gitara chalishni o‘rgangan. Kan maktabning musiqali teatr spektakllarida ishtirok etgan. Shuningdek, aktyor 2007-yilda “Fly to the Sky” guruhining “Still Pretty Today” va 2017-yilda “Epik High” guruhining “Lost One” qo‘shiqlari klipida rol o‘ynagan.

Cho Yuri (Kim Chonxi, 222 raqamli o‘yinchi)

Netflix Cho Yuri “Kalmar o‘yini”ning ikkinchi mavsumida suratga tushishini e’lon qilganida, muxlislar IZ*ONE guruhining sobiq vokalisti ushbu rolni uddalay oladimi yoki yo‘qmi, deb xavotirda edi. 23 yoshli qiz nafaqat iste’dodli qo‘shiqchi, balki mahoratli aktyor ekanligini ham isbotladi.

Ikkinchi mavsumda Cho Yuri Kim Chonxi rolini o‘ynaydi. U ijro etgan qahramonning hayoti serialdagi eng dramatik voqealardan biri. Qiyinchiliklarga qarshi kurashadigan bo‘lajak ona obrazi Janubiy Koreyada e’tirofga sazovor bo‘ldi. Tanqidchilar aktrisa ayolning zaifligi va qat’iyatini mahorat bilan o‘ynaganini alohida ta’kidladilar.

Musiqiy karyerasi

Cho Yuri — haqiqiy K-pop idoli. Dastlab 2017-yilda u idol maktabida 15-o‘rinni egallagan, keyin Produce 48 shousida uchinchi o‘rinni olib, IZ*ONE guruhining bosh vokalistiga aylangan. Afsuski, IZ*ONE 2021-yil aprel oyida tarqab ketdi. Ammo 2021-yil oktyabr oyida Cho “Glassy” xiti bilan yakkaxon ijrochi sifatida debyut qildi.

Chxve Sonxen yoki T.O.R. (Tanos, 230 raqamli o‘yinchi)

Xonanda 1987-yil 4-noyabrda Seulda tug‘ilgan. Dastlab u underground reper sifatida tanilgan, ammo mashhur BigBang K-pop guruhining yetakchi ijrochisi bo‘lib shuhrat qozongan.

Sonxenning ikkinchi mavsumda ishtirok etishi aktyorning katta sahnaga qaytishi bo‘ldi. Narkotiklar bilan bog‘liq janjal tufayli T.O.R. Janubiy Koreyada 9 yillik media taqiqi ostida bo‘lgan. Serialda Chxve Tanos taxallusi ostidagi antagonist rolini o‘ynaydi.

Tanos — yorqin binafsharang sochi, bo‘yalgan tirnoqlari va g‘alati xatti-harakatlarga ega giyohvand reper.

Musiqiy karyerasi

T.O.R. dunyoga mashhur BigBang K-Pop guruhining a’zosi edi. Jamoa K-hiphop va K-pop sahnasida katta ta’sir ko‘rsatdi. Guruhning ba’zi xitlari jahon chartlarida birinchi o‘rinni egallagan: “Lies”, “Fantastic Baby” va “Bang Bang Bang”.

T.O.R. yakkaxon loyihalar bilan ham shug‘ullangan: mashhur “Doom Dada” trekini chiqargan va BigBang ishtirokchisi bilan G-Dragon taxallusi ostida hamkorlik qilgan — ular birgalikda “High High” va “Knock Out” xitlari bilan GD & TOP albomini yozishgan.

“Kalmar o‘yini”ning ikkinchi mavsumi yorqin aktyorlik tarkibi tufayli millionlab tomoshabinlarni maftun etdi. Uchinchi mavsum ko‘rsatkichlarni maksimal darajaga ko‘tarishi va undagi qaltis vaziyatlar muxlislarni yanada ta’sirlantirishi aniq, chunki serialda faqat birgina ishtirokchi g‘olib bo‘ladi.