Голливуд юлдузлари саҳна ва экранларда ўз маҳоратини кўрсатибгина қолмай, реал ҳаётда саховат ва меҳр-оқибат намунаси бўла олишади. Қуйида оғир ҳаётий синовларга дуч келган инсонларга ёрдам қўлини чўзган ва бошқа инсонийлик фазилатлари билан янада кўпроқ эҳтиром қозонган актёрлар ҳикояларини келтирамиз.
Пол Уокер жуфтликка олмос узук совға қилган
2004 йилда Кайл Апхем ва унинг ўша пайтдаги қаллиғи, ҳозирги рафиқаси Кристен билан заргарлик дўконларидан бирида бриллиант кўзли узук қидираётган эди. Улардан ташқари, дўконда яна бир харидор бор эди, лекин жуфтлик унга эътибор қаратмади.
Эркак Кайл ва Кристенга қимматроқ буюмларни кўришни маслаҳат берди, аммо жуфтлик бунга пули етмаслигини тан олди. Суҳбатдан сўнг улар ниҳоят Пол Уокерни таниди. Кайл актёрга армияда хизмат қилгани ва яқинда иккинчи марта Ироққа кетиши ҳақида айтиб берди. Сафардан олдин Кайл бўлажак турмуш ўртоғига узук совға қилишни истаган эди.
Кристеннинг эслашича, Кайлнинг аскарлигини эшитган Полнинг юзи ўзгарди. Ўша куни жуфтлик ҳеч нарсани тушунмай, дўконни тарк этди. Ёшлар ҳеч нарса сотиб олмади — олмос кўзли узуклардан бири қизга ёққан бўлса-да, бундай тақинчоқ жуфтликка қимматлик қилди.
Аммо тез орада улар кутмаган иш бўлди: дўкон ходими қўнғироқ қилиб, улардан 9 минг долларлик узукни олиб кетишни сўради. Узук пулини номаълум киши тўлаган эди. Ёшлар буни билишга ҳаракат қилди, аммо дўкон ходимлари бу одам ким эканлигини ошкор этмади.
Ҳақиқат 2013 йилда юзага чиқди. Брайан O’Коннор ролини ўйнаган “Форсаж” фильмлари юлдузи жанговар фильмнинг еттинчи қисмини суратга олиш вақтида автоҳалокатда вафот этади. Шундан кейингина дўкон маслаҳатчиларидан бири ушбу воқеани журналистларга айтиб беради ва аноним одам аслида Уокер эканлиги тасдиқланади.
Киану Ривз хайрия ташкилотларини аноним тарзда бошқаради
Киану Ривз ўзининг сахийлиги ва хайрия ишлари билан танилган. У болалар шифохоналарига мунтазам равишда маблағ ажратиб, ҳатто ўз хайрия жамғармасини ташкил этган. Бироқ у бу фаолиятини аноним тарзда олиб боради, шунинг учун жамғарманинг номи ва қайси шифохоналарга ёрдам бераётгани ҳақида маълумотлар оммага ошкор қилинмаган.
Том Круз машина уриб юборган қизни касалхонага олиб борган ва даволаниш харажатларини тўлаган
Фильмларда Том Круз кўпинча довюрак ва жасур қаҳрамонларни ижро этади ва бу жиҳатлар ҳақиқий ҳаётдаги Том учун ҳам хосдир. 1996 йилда актёр Санта Моникада 23 яшар қизни машина уриб кетганига гувоҳ бўлган. Тез ёрдамга қўнғироқ қилган Круз тиббиёт ходимлари етиб келгунича қизнинг олдидан жилмаган. Жабрланувчининг тиббий суғуртаси йўқлигини билганидан кейин эса ўз ҳисобидан 7000 доллар тўлаган. Қиз бу вақтда Томни танимаган ва ўзига келгачгина, Голливуд юлдузи унга ёрдам берганини билган.
Бу ҳали ҳаммаси эмас. Орадан йиллар ўтиб яна Том Круз яна бир неча марта жонбозлик кўрсатган. Қўшни аёл машинадан тушганида зўравонлар уни ўраб олиб, 153 минг долларлик тақинчоқларини юлиб, олиб кетмоқчи бўлган. Шу вақт Том қўриқчилари билан бирга пайдо бўлган ва жиноятчиларни ҳайдаб юборган.
Харрисон Форд скаут болани қутқарган
“Юлдузлар жанги” фильмида Харрисон Форд учувчи Хан Соло ролини ўйнаган. Маълум бўлишича, актёр реал ҳаётда ҳам учувчилик маҳоратига эга. У тажрибали вертолёт бошқарувчиси бўлиб, бўш вақтида бедарак йўқолганларни излаб топиш ва уларни қутқариш билан шуғулланади. 2001 йилда Форд Ютадаги скаут болалардан бири йўқолиб қолганини эшитгач, ёрдамга келади.
Скаут болалар — бу 11-18 ёш оралиғидаги ўсмир йигитлардан иборат халқаро ёшлар ҳаракати аъзолари. Улар табиат қўйнида яшаш, ўзига ва бошқаларга ёрдам бера олиш, жамоада ишлаш, етакчилик каби кўникмаларни ўрганишади.
13 ёшли бола ўз гуруҳидан ажралиб қолиб, бутун ёмғирли тунни Еллоустоун миллий боғи яқинида ўтказган. Харрисон ҳеч иккиланмасдан ўз вертолётида ҳавога кўтарилган ва бир неча соатдан сўнг болани лагеридан 16 километр узоқликдан топган.
2000 йилда Харрисон Форд Идахо тоғларида йўқолган сайёҳ Сара Жоржни ўзининг вертолёти билан қидириб топиб, қутқариб қолган. Шунингдек, 2017 йилда Калифорнияда автоҳалокатга учраган ёш аёлга ёрдам бериб, уни хавфсиз жойга олиб чиқишда ёрдам берган.
Алан Рикман ресторандаги тўловларини доим ўзи тўлаган ва бегона болаларга “Гарри Поттер” фильмини суратга олиш ишларини кўрсатган
Северус Снейп ролини ўйнаган Алан Рикман шундай одам эдик, дўстлари ва яқин инсонлар учун ресторан тўловларини доим ўзи амалга оширар эди. Агар бошқа биров тўлаш учун ўрнидан турса ҳам, Алан мўжизавий эпчиллик билан биринчи бўлиб официантга картасини узатар эди.
Бошқа актёрларнинг сўзларига кўра, Алан “Гарри Поттер” асарини севиб ўқиган кўплаб нотаниш болаларни олиб келиб, уларни саҳна ортида бўлаётган ишларни кўрсатган. Ўша болалардан бири Жей 15 ёшда эди. У умрининг сўнгги ҳафталарини “Гарри Поттер”да ўйнашни орзу қилиб ўтказаётган эди. Продюсер Паула Дюпре Жейнинг истагини эшитгач, унга ҳеч қандай ёрдам бера олмаслигини айтган, лекин Рикман аралашиб, боланинг қўлидан ушлаб, уни Ремус Люпин олиб бораётган дарс саҳнасидаги болалар орасига қўшиб қўйган. Аммо марҳум Жей фильмдаги бу кадрдан жой олмаган.
Робин Уильямс уйсизларга ёрдам берган
Бирор фильм суратга олишдан аввал шартнома тузилганда актёрлар нафақат гонорар миқдорига, балки суратга олиш майдон шароитлари, яшаш тарзи, парвоз чиқимлари ва шахсий эҳтиёжларига ҳам алоҳида эътибор беришади. Аммо актёр Робин Уильямс режиссёрларга ажойиб шарт қўяр эди: агар студия у билан ишлашни истаса, ҳар бир фильмни суратга олиш пайтида суратга олиш жойи ёки кўчадаги уйсиз одамларни ёллашга мажбур бўлишган.
Уйсизлар оддий вазифаларни бажаришар: асбоб-ускуналарни ушлаб турар ёки кичик эпизодларда чиқишлари керак бўлган. Энг асосийси, уларга вақтинча бошпана ва кундалик маош бериб турилган ва уйсизлар ўзини тиклаб олишлари учун имконият берилган. Карьерасининг охирига келиб Робин 1500 дан ортиқ бошпанасизларга шу тариқа ёрдам берган.
Жон Сина ўлим ёқасидаги болаларнинг 600 дан ортиқ орзу ва тилакларини бажарган
1980 йилда Аризона штатининг Феникс шаҳрида яшашга оз вақтлари қолган болалар учун махсус жамғарма ташкил этилди. Америкалик актёр Жон Сина “Make A Wish” жамғармаси орқали 650 дан ортиқ болаларнинг орзу ва тилакларини амалга ошириб, янги рекорд ўрнатган. Мазкур жамғарма оғир касалликка чалинган 2,5 ёшдан 18 ёшгача бўлган болаларнинг тилакларини бажаришга ёрдам беради.
У 2002 йилда илк бор ушбу жамғарма билан ҳамкорликни бошлаган ва ўшандан бери кўплаб ёш болаларнинг орзуларини рўёбга чиқарган. Жон Сина ушбу фаолияти давомида болалар ва уларнинг оилаларига қувонч улашиб, кўплаб ёш қалбларга умид бахш этган.
Колин Фаррелл бир одамнинг ҳаётини ўзгартириб юборган
Торонто кўчаларида кезиб юрган Колин Фаррелл тасодифан ўзи танимаган уйсиз одам билан суҳбат қуриб, бир неча дақиқадан сўнг уни кийим-кечак дўконига боришга таклиф қилган. У ерда эркак хоҳлаган нарсасини олишни буюрган. Умумийи ҳисоб икки минг доллардан ошиб кетган. Сўнг Колиннинг янги таниши вақтинча бирор жойда хонани ижарага яшаб туриши учун яна 830 доллар берган. Актёр кейинги йилларда ҳам у билан алоқада бўлишда давом эттирди. Бир пайтлар бошпанасиз қолган йигит Фаррел туфайли янги ҳаёт бошлади.
Изоҳ (0)