Mashhur film yoki serialdagi roliga g‘ayrioddiy sabablarga ko‘ra rozi bo‘lgan Gollivud aktyorlari

Aktyorning gonorari — uning daromadi bo‘lib, undan kamdan kam odam o‘z ixtiyori bilan voz kechadi. Ammo ba’zida shunday bo‘lishi ham mumkin — aktyorlar noodatiy shartlar asosida rolga rozi bo‘lishadi.

“Dedpul”da bir finjon qahva uchun rol o‘ynagan Bred Pitt

“Dedpul”ning original ssenariysida ko‘rinmas odam yuzini oshkor qilmasligi kerak bo‘lgani uchun bu rolga hech kim tayinlanmagandi. Rayan Reynolds filmni sayqallayotib, yakuniy sahnaga yetib kelganida miyasiga qaydisir yulduzni epizod rolga taklif qilish fikri keladi. Shu tariqa Bred Pitt jamoaga qo‘shiladi, u kasaba uyushmasi qoidalariga ko‘ra mumkin bo‘lgan minimal gonorar va bir finjon qahva evaziga ushbu rolni o‘ynashga rozi bo‘ladi. Ammo eng muhim shart shuki, bu qahvani shaxsan Rayan Reynolds olib kelishi kerak edi. Bred yarim soat davomida qat’iy maxfiy holatda suratga tushadi. Bu vaqt ichida Reynolds qahvaxonaga borishga, qahva sotib olib qaytishga ulguradi. Pitt haqida faqat bir nechta odam bilgani sababli uning “Dedpul 2” filmida paydo bo‘lishi tomoshabinlar uchun kutilmagan voqeaga aylanadi.

Richard Harrisni nabirasi ko‘ndirgan

90-yillarning oxiriga kelib, Richard Harris asosan ikkinchi darajali rollarni o‘ynay boshlaydi. U keyingi hayotini taxminan shunday tasavvur qilardi: vaqti-vaqti bilan kinoda rol o‘ynash, lekin haddan tashqari berilib ketmaslik uchun oldingi planda emas, balki orqa planda chiqish. Shu sababli “Garri Potter” uning rejasiga to‘g‘ri kelmagan, chunki u bir vaqtning o‘zida bir nechta film uchun shartnoma imzolashi kerak edi, shuning uchun Richard buni rad etadi. Lekin keyin unga takroriy taklif kelib tushadi — uning gonorari oshirilgandi. Richard yana rad etadi — gonorar yana oshiriladi. Harris qachongacha rad etishgani noma’lum, ammo 11 yoshli nabirasi Ella bundan xabar topgach, Richardga boshqa tanlov qolmaydigan gap aytadi: “Bobo, agar Dambldorni o‘ynamasangiz, siz bilan boshqa gaplashmayman”. Bu gaplardan keyin Richard rolga darhol rozi bo‘ladi.

Bill Myurrey rejissyorlar familiyasini chalkashtirib yuborgan

Aka-uka Koenlar “Fargo”, “Bu yerda qariyalarga o‘rin yo‘q”, “Katta Lebovski”, “Temir changak” va boshqa bir qancha filmlarni suratga olgan bo‘lib, ular nafaqat oddiy tomoshabinlar, balki aktyorlar tomonidan ham sevib tomosha qilingan. Ko‘pchilik aka-uka bilan ishlashni xohlardi, bir paytlar Bill Myurrey Joel Koen filmi ustida ishlayapman deb o‘ylagan, lekin bunday emasligini juda kech tushunib qolgan. 2000-yillarning boshlarida unga “Garfild” ssenariysi yuborilgan, ssenariy Joel Koen tomonidan yozilganini ko‘rgan zahoti filmga rozi bo‘lgan. Biroq hamma bilgan odamga emas. Mashhur rejissyor va ssenariy muallifining familiyasi Coen, “Garfild”ning ssenariy muallifi esa Cohen. Bill Myurrey bu kichik tafsilotdan, hatto ikkinchi Koenning borligidan ham bexabar edi, shuning uchun o‘ylab-netib o‘tirmay “Garfild”ga rozi bo‘ladi. Biroz vaqt o‘tgach, u malla mushukka ovoz berishga keldi, ammo dialoglarni o‘qiyotganda dovdirab qoladi. Bill Koenning nega bunday yozganiga tushunmaydi, multfilmni ko‘rgandan so‘ng hafsalasi pir bo‘ladi: “Bu ishni kim qildi, jin ursin? Koen nimani o‘ylayotgandi?”. Shundan keyingina Myurreyga bu u o‘ylagan Joel Koen emasligini tushuntirishadi.

Liam Nison serharakat syujetdan charchagan

“Garov” filmida Liam Nison sobiq maxfiy xizmat agenti rolini o‘ynaydi, uning qizi noma’lum bosqinchilar tomonidan o‘g‘irlanadi, ota qizini qutqarish uchun yo‘lga chiqadi. Syujetdan nusxa ko‘chirilganiga qaramay, film yana kassada muvaffaqiyatga erishadi. Biroq Liam bundan shunchalik charchagan ediki, unga trikvel o‘ynashni taklif qilishganda, garovga olingan qizini qutqaradigan ota rolini o‘ynamayman, degan shart qo‘yadi.

Karim Abdul-Jabbor gonorariga gilam olishni xohlagan

1978-yilda basketbolchi Karim Abdul-Jabbor birinchi filmida Bryus Li bilan rol o‘ynaydi. Ikki yildan so‘ng uni Lesli Nilsen bilan “Aeroplan” parodiya komediyasida kichik rol o‘ynashga taklif qilishadi. Karim rozi bo‘ladi, lekin gonorarini 30 mingdan 35 mingga oshirishni so‘raydi. Ma’lum bo‘lishicha, basketbolchi devorga osib, san’at asari sifatida tomosha qilish uchun sotib olmoqchi bo‘lgan sharq gilami aynan shuncha turarkan.

Bryus Uills garovda yutqazgan

2000-yilda Bryus Uillis va Mettyu Perri “To‘qqiz yard” filmida rol o‘ynaydi, ammo, Bryus film kassada muvvafaqiyatsizlikka uchrashiga ishonchi komil edi. Metyu esa aksincha, mashhur bo‘lishiga ishonib, Uillis bilan garov o‘ynaydi. Oxir-oqibat “To‘qqiz yard” film byudjetidan 2,5 barobar ko‘p daromad oladi va Bryus yutqazadi. Jazoning bir turi sifatida u “Do‘stlar” filmida kichik rol o‘ynashi kerak edi. Biroq bu umuman jazo emasdi, chunki Uillis shu roli sabab “Emmi” mukofotini qo‘lga kiritadi va “Do‘stlar”ning unutilmas mehmon yulduzlaridan biriga aylanadi.